Улаанбаатар /МОНЦАМЭ/. Засгийн газар өнөөдөр ээлжит бусаар хуралдаж, "COVID-19"-өөс урьдчилан сэргийлэх, эрсдэлийг бууруулах зорилгоор Монгол Улс - ОХУ-ын хилийн "Боршоо", "Цагааннуур" боомтыг 11 дүгээр сарын 2-ноос 21 хоног хаахаар шийдвэрлэлээ.

Энэ талаар Монгол Улсын Шадар сайд Я.Содбаатар мэдээлэхдээ, "Манай улстай хил залгаа ОХУ-ын бүс нутагт өвчлөл нэмэгдэж, дэлхий даяар цар тахлын хоёр дахь давалгаа эрчимтэй өрнөж байна. Үүнтэй холбоотойгоор улс орнууд хөл хорио тогтоох, онц байдал зарлах, хилээ хаах зэрэг арга хэмжээ авч эхэлсэн. Сүүлийн өдрүүдэд улс хоорондын ачаа тээвэр (ТИР)-ийн жолооч нараас COVID-19 илрэх болсон. Одоогийн байдлаар, 30 жолоочоос вирус илрээд байна. Тухайлбал, өнгөрсөн шөнө Цагааннуурын боомтоор орж ирсэн хоёр орос жолоочоос халдварын тохиолдол илэрлээ" хэмээв.

Манай улсын баруун хилээр өнөөдрийн байдлаар, нефтийн бүтээгдэхүүн, малын тэжээл, өргөн хэрэглээний бараа зэрэг зөвхөн ачаа тээвэр хэвийн үргэлжилж байсан. Тэгвэл нөхцөл байдалтай холбогдуулан дээрх хилийн боомтуудыг 21 хоног бүрэн хааж буйг Шадар сайд мэдээлэлдээ онцолсон. Цар тахлын нөхцөл байдал амаргүй болсон энэ үед ард иргэд халдвар хамгааллын дэглэмээ чанд сахихыг анхаарууллаа. 

Мэдээллийн дараа сэтгүүлчид зарим зүйлийг тодрууллаа.

-Дээрх хилийн боомтуудаар орж ирдэг гол бүтээгдэхүүн нь шатахуун байдаг. Тэдгээр боомтуудыг хааснаар манай улсад шатахууны хомсдол үүсэх үү?

-Баруун бүсээр орж ирж байгаа хөдөлгөөний гол бараа нь нефтийн бүтээгдэхүүн. Монгол Улс нефтийн нэг сарын нөөцтэй. Төвийн бүсээс баруун аймгуудад нефть татах ажил зохион байгуулна. Нефтийн нөөцөд хүндрэл гарахгүй. Мөн 21 хоногийн дараа хилийн боомтыг нээснээр гарагийн хязгаарлалтаар нефть оруулах асуудлыг шийдвэрлэнэ. 

-Үүнтэй холбоотой өргөн хэрэглээний бараа, шатахууны үнэ өсөх эрсдэл үүсэх үү?

-Засгийн газраас дэлхий даяар тархаад буй цар тахлын үед өргөн хэрэглээний үнэ ханшийг нэмэхгүй байх, хохирол багатай давах чиглэлээр ажиллаж байна. Энэ хүрээнд аж ахуйн нэгжүүдтэй олон талаар хамтран ажиллаж байгаа. Нефть импортолж байгаа аж ахуйн нэгжүүдтэй уулзаж харилцан ойлголцоно. Нэг сарын нөөц байгаа тул зах зээлд хомсдол үүсэхгүй. Цар тахал эхэлснээс хойш хилээр орж гарч байгаа бүх хөдөлгөөн хяналтад байгаа. Өмнө нь бүх боомтуудаар орж ирж байгаа ачаа тээвэр хилээр гарах хүртлээ цагдаагийн хатуу хяналтад явж байсан. Хилийн чанад дахь нөхцөл байдал хүндэрсэн тул хяналтыг илүү чангатгаж байгаа юм. 

-Бусад хилийн боомтуудад нөхцөл байдал ямар байна вэ?

-Алтанбулаг, Замын-Үүд, Гашуунсухайт, Шивээхүрэн зэрэг бусад боомтуудад тусгаарлалтын цэг гаргахаар УОК-ын шийдвэр гарсан. Энэ хүрээнд аж ахуйн нэгжүүд тухайн цэгээс очиж ачаа бараагаа нааш нь татан авахаар болсон. Ерөнхийдөө хилийн боомтуудаас нааш ачаа тээврийн жолооч нэвтрүүлэхгүй байх арга хэмжээ авч байна. 

-Цагааннуур боомтод долоо хоногийн өмнөөс шинжилгээ авч эхэлсэн гэсэн мэдээлэл байна. Өмнө яагаад шинжилгээ авч байгаагүй юм бэ?

-Бид хамгийн их хөдөлгөөнтэй байгаа боомтуудаар PCR шинжилгээ авч байсан. Цагааннуур боомтод долоо хоногийн өмнөөс шинжилгээ авч эхэлснээр орос хоёр жолоочоос өчигдөр шөнө вирус илэрсэн. Өмнө нь Цагааннуур боомтоор орж ирж байсан ачаа тээврийн жолооч нарыг эрүүл ахуйн халдвар хамгааллын журмыг чанд сахин цуваагаар цагдаагийн хяналтад гуперлэж байсан. Нэмж шинжилгээ авч хяналтаа улам сайжруулах болсон. Өглөө ОХУ-тай дипломат харилцааны шугамаар харилцаж тухайн хоёр иргэнийг эх оронд нь буцаасан. 

Нэмж хэлэхэд, ажиллах хүчтэй холбоотой асуудал хэвлэл мэдээллээр их явж байна. Ажиллах хүчний хувьд 37 орноос ямар нэгэн байдлаар ажиллах хүч орж ирсэн. Ингэхдээ, бүгд халдвар хамгааллын дэглэмийг хууль хүчний байгууллагын хяналтад 21 хоногийн хугацаанд сахиж, давтан шинжилгээ өгч байгаа.