Ерөнхийлөгч Х.Баттулга Монгол-Германы Зэвсэгт хүчний хамтарсан сургалттай танилцлаа

МОНГОЛЫН МЭДЭЭ | УЛС ТӨР
ariunbold@montsame.gov.mn
2020-10-20 17:58:43

Улаанбаатар /МОНЦАМЭ/. Монгол Улсын Ерөнхийлөгч, Зэвсэгт хүчний Ерөнхий командлагч Халтмаагийн Баттулга өнөөдөр Монгол Улс-Холбооны Бүгд Найрамдах Герман Улсын /ХБНГУ/ Зэвсэгт хүчний хамтарсан Уулын явган цэргийн дунд шатны сургалтын явцтай танилцлаа.


Тус сургалт нь Монгол Улсын Зэвсэгт хүчний Уулын тусгай батальон буюу 331 дүгээр ангийн алба хаагчдыг дадлагажуулах, тэднийг бие даан уулын сургалт явуулах нөхцөлийг бүрдүүлэх, уулын чиглэлээр мэргэшүүлэх зорилготой юм. Тодруулбал, Монгол Улс, ХБНГУ-ын батлан хамгаалах салбарын хамтын ажиллагааны хүрээнд хоёр улсын Зэвсэгт хүчний хамтарсан Уулын явган цэргийн анхны сургалтыг 2019 оны тавдугаар сарын 15-23-нд ХБНГУ-д зохион байгуулж, Зэвсэгт хүчний уулын тусгай батальоны 4 алба хаагч ажиглагчийн статустай оролцон туршлагажжээ.


Улмаар Зэвсэгт хүчний Уулын тусгай батальон, ХБНГУ-ын Уулын явган цэргийн 23 дугаар бригадын сургалтын хөдөлгөөнтэй бүлэгтэй хамтран Уулын явган цэргийн анхан шатны сургалтыг 2019 оны есдүгээр сарын 30-наас аравдугаар сарын 24-нд Зэвсэгт хүчний сургалтын нэгдсэн төвд зохион байгуулж, 60 цэргийн алба хаагч оролцсон байна.


Харин энэ удаагийн буюу дунд шатны сургалтыг энэ сарын 2-30-нд Зэвсэгт хүчний сургалтын нэгдсэн төвд “Уулын явган цэргийн тактикийн ажиллагаа-буудлага”, Горхи-Тэрэлжийн байгалийн цогцолборт газарт “Тактикийн ажиллагаа-хадан авиралт” сэдвийн хүрээнд зохион байгуулж, хоёр улсын 90 цэргийн алба хаагч оролцож байна.


Монгол Улсын Ерөнхийлөгч, Зэвсэгт хүчний Ерөнхий командлагч Х.Баттулга сургалтын явцтай танилцсаныхаа дараа бие бүрэлдэхүүнд хандан үг хэллээ.


Тэрбээр, "Одоогоос 27 жилийн өмнө Монгол Улс, ХБНГУ цэргийн дипломат харилцаа тогтоосноос хойш цэргийн салбар дахь гадаад харилцаа, хамтын ажиллагаа нь жилээс жилд өргөжин хөгжиж, 1995 оноос хойш Герман улсад суралцсан офицер ахлагч нарын тоо 250 хүрсэн ба өнөөдрийн байдлаар 15 цэргийн алба хаагч амжилттай суралцаж байна. Монгол Улсын батлан хамгаалах салбар, тэр дундаа Зэвсэгт хүчин нь манай хоёр улсын хамтын ажиллагааг хөгжүүлэхэд тодорхой үүрэг гүйцэтгэж ирсэн уламжлалтай. Үүнд: Афганистан улсад энхийг дэмжих ажиллагаанд ХБНГУ-ын тэргүүлсэн Хойд бүсийн командлалд манай цэргийн баг мотобуудлагын салааны бүрэлдэхүүнтэйгээр Германы цэргүүдтэй 2009 оны 12 сараас эхлэн мөр зэрэгцэн үүрэг гүйцэтгэсэн. Нийтдээ давхардсан тоогоор 2,400 гаруй цэргийн алба хаагч Афганистан улсад үүрэг гүйцэтгэсэн байна. Хоёр орны цэргийн хамтын ажиллагаа жилээс жилд өргөжин хөгжиж байгаагийн нэгэн илэрхийлэл болж, хамтын ажиллагаанд түүхийн шинэ хуудсыг нээсэн Зэвсэгт хүчний хамтарсан, уулын явган цэргийн дунд шатны сургалтад оролцож байгаадаа баяртай байна. Манай хоёр улсын батлан хамгаалах салбарын хамтын ажиллагаагаар дамжуулан бусад салбаруудын хамтын ажиллагааг харилцан хөгжүүлж, иж бүрэн түншлэлийн түвшинд хүрсэн ололтыг бататган, харилцаа, хамтын ажиллагаагаа гүнзгийрүүлэхийн төлөөх үйл явцад батлан хамгаалах салбар, Зэвсэгт хүчин маань манлайлан ажиллана гэдэгт итгэлтэй байна" гэлээ

Холбоотой мэдээ