Улаанбаатар
НҮБ-ын 75 жилийн ойг тэмдэглэх өндөр түвшний уулзалт болж байна
МОНГОЛЫН МЭДЭЭ | ГХЯ-НЫ МЭДЭЭ
Улаанбаатар /МОНЦАМЭ/. АНУ-ын Нью-Йорк хотноо НҮБ-ын 75 жилийн ойг тэмдэглэх өндөр түвшний уулзалт “Бидний хүсэж буй ирээдүй, бидэнд хэрэгтэй НҮБ: Олон талт хамтын ажиллагааг хөгжүүлэх хамтын үүрэг амлалтаа дахин нотлох нь” сэдвээр болж байна.
Уулзалтын эхэнд НҮБ-ын Ерөнхий Ассамблейн 75 дугаар чуулганы дарга Волкан Бозкир, НҮБ-ын Ерөнхий нарийн бичгийн дарга Антонио Гутеррес, НҮБ-ын Аюулгүйн Зөвлөлийг даргалж буй Нигери Улсын Байнгын төлөөлөгч Абдоу Абарру, НҮБ-ын Эдийн засаг, нийгмийн зөвлөлийн дарга, Пакистан Улсын Байнгын төлөөлөгч Мунир Акрам, Олон улсын шүүхийн дарга Абдулкави А.Юсүф нар үг хэлэв.
Тэд хэлсэн үгэндээ өнгөрсөн 75 жилийн хугацаанд НҮБ нь дэлхий нийтэд энх тайвныг тогтворжуулах, олон улсын эрх зүй болон хүний эрхийн хэм хэмжээг тогтоож, сахин хамгаалах, колончлол болон арьс өнгөөр ялгаварлах үзлийг халах, өлсгөлөн болон ядуурлыг бууруулахад хувь нэмэр оруулсан төдийгүй дэлхий ертөнцөө хөгжүүлэх болон хамгаалах олон зорилт, хөтөлбөр, гэрээг батлан хэрэгжүүлсэн, хэрэгжүүлж буйг цохон тэмдэглэв. Улмаар "COVID-19" цар тахал нь дэлхий, хүн төрөлхтний өнөөгийн эмзэг байдал, түүнийг шийдвэрлэхэд олон талт хамтын ажиллагааны ач холбогдлыг илтгэн харуулж байгаа бөгөөд өөрчлөгдөж буй НҮБ нь цаашдын сорилтуудыг даван туулахад урьдын адил их үүрэг, хариуцлага хүлээж чадна хэмээн итгэж буйгаа илэрхийллээ.
Өндөр түвшний уулзалтын энэ сарын 21-ний хуралдаанд 122 орны төр, засгийн тэргүүн нар оролцож, дэлхийн энх тайван, аюулгүй байдлыг бэхжүүлэх, нийгэм, эдийн засгийг хөгжүүлэх, хүний эрхийг хамгаалахад НҮБ-ын гүйцэтгэсэн үүрэг, “COVID-19”-тэй тэмцэх, Тогтвортой хөгжлийн 2030 хөтөлбөрийг хэрэгжүүлэх, зөрчилдөөн мөргөлдөөн, уур амьсгалын өөрчлөлт, үл итгэлцэл, шинэ технологиос үүдэлтэй сорилтууд, тэдгээрийг даван туулах асуудлаар байр сууриа илэрхийлсэн юм.
НҮБ-ын 75 жилийн ойг тэмдэглэх өндөр түвшний уулзалт үргэлжилж байна.
