Хууль бусаар мод бэлтгэсэн эсэхийг мэргэжлийн байгууллага шалгаж байна

Орон нутагт | Төв
tuv@montsame.gov.mn
2020-08-22 12:27:12

Төв /МОНЦАМЭ/. Төв аймгийн Батсүмбэр сумын Сөгнөгөрийн аманд аж ахуй нэгж, иргэд  хууль бусаар нойтон мод бэлтгэж байгаа талаарх мэдээлэл цахим орчинд олон хүний шүүмжлэлийг дагуулж буй. 

Уг мэдээллийн дагуу тус аймаг дахь цагдаагийн газрын экологийн асуудал хариуцсан эрүүгийн ахлах мөрдөгч цагдаагийн ахлах, дэслэгч Л.Баянмягмараас тодруулахад

-“Төв аймгийн Батсүмбэр сум Цогт-Өндөр хоёрдугаар багийн нутаг дэвсгэр Сөгнөгөрийн аманд иргэд хууль бусаар мод бэлтгэх ажил явагддаг гэх мэдээлэл сошиал орчинд олон нийтэд хүрсэн.


Тус мэдээллийн дагуу наймдугаар сарын 12-ны өдөр Төв аймаг дахь цагдаагийн газраас ажлын хэсэг гарч энэхүү мэдээллийн дагуу шалгалтын ажиллагаа явуулж байна. Шалгалтын ажиллагаагаар Сөгнөгөрийн аманд гурван аж ахуй нэгж, зургаан иргэн мод бэлтгэсэн байсан.

Одоогоор дээрх гомдол мэдээллүүдийг цагдаагийн тоо бүртгэлээр оруулж, шалгалтын ажил хийгдэж байна.


Мөн наймдугаар сарын 20,21-ний өдрүүдэд Экологийн цагдаагийн алба, БОАЖЯ-ы ой хөгжлийн төв сум дундын ойн ангийн алба хаагчид хамтран мод бэлтгэсэн аж ахуй нэгж байгууллагуудыг мод бэлтгэх ёстой зориулалтын талбайд мод бэлтгэсэн эсэхийг  мэргэжлийн байгууллагын алба хаагчидтай хамтран шалгаж байна” хэмээв.



Холбоотой мэдээ