Улаанбаатар
АСЕМ-ын Загвар чуулганд оролцогчдын бүртгэл энэ 7 хоногт дуусна
МОНГОЛЫН МЭДЭЭАСЕМ-ын дээд түвшний 11 дэх уулзалтын хүрээнд зохион байгуулах “АСЕМ-ын Загвар чуулган 2016” чуулганы бүртгэл энэ сарын 13-ны өдрөөр дуусгавар болно.
“АСЕМ-ын Загвар чуулган 2016” чуулганыг Ази, Европын сан, Гадаад хэргийн яам, Монголын залуучуудын Холбоо хамтран зохион байгуулахаар болсон. Ерөнхий зохион байгуулагчаар Монголын залуучуудын холбоо ажиллаж байгаа бөгөөд чуулганы бэлтгэл ажил эрчимжиж байна.
Энэ хүрээнд Гадаад хэргийн яамтай ажлын хэсгийн уулзалтыг тухай бүрт зохион байгуулж, чуулганы бэлтгэл ажлыг хангахын зэрэгцээ чуулганд оролцогчдын бүртгэл үргэлжилж байна. Чуулганд 18-30 насны англи хэлний дундаас дээш түвшний мэдлэгтэй хурал зөвлөгөөнд оролцож байсан залуусыг сонгон шалгаруулж оролцуулах юм. Одоогийн байдлаар 300 гаруй оюутан онлайнаар бүртгүүлсэн байна. Мөн МУИС, ШУТИС зэрэг томоохон их дээд сургуулиудын гадаад оюутнуудыг бүртгэж эхлээд байгаа аж.
