Хүүхэд хамгааллын чиглэлээр “Дэлхийн Зөн Монгол” олон улсын байгууллагатай хамтарна

Монголын мэдээ | Боловсрол
bolor@montsame.mn
2019-09-10 07:59:16

Улаанбаатар /МОНЦАМЭ/. БСШУСЯ Дэлхийн Зөн Монгол Олон улсын байгууллагатай хүүхэд хамгааллын чиглэлээр харилцан ойлголцлын санамж бичгийг өчигдөр байгууллаа.

Санамж бичигт БСШУСЯ-ны Төрийн нарийн бичгийн дарга Б.Баярсайхан, Дэлхийн Зөн Олон Улсын байгууллагын суурин төлөөлөгч Филиф, Ийвэрт нар гарын үсэг зурав. Энэ хүрээнд боловсролын салбарт хүүхдийг аливаа эрсдэл, хүчирхийлэлд өртөхөөс урьдчилан сэргийлэх, хүүхдэд ээлтэй, аюулгүй орчин бүрдүүлэхэд хамтран ажиллах юм. 

Тодруулбал, хүүхдийг сургалтын орчинд бие махбодын шийтгэл, сэтгэл зүйн болон үе тэнгийнхний дарамт, үл хайхрах байдал, гэмт хэрэг, зөрчил, хорт зуршилд өртөхгүй байх нөхцөлийг бүрүүлэхийн тулд тэдний амьдрах ур чадварыг нэмэгдүүлэх замаар бэрхшээлийг даван туулах, аливаа хүчирхийлэл дарамт, мөлжлөгөөс өөрийгөө хамгаалах ур чадварыг сайжруулах юм. Мөн боловсролын орчинд ажиллаж буй хүний нөөцийг “Хүмүүжлийн эерэг арга”-д сургаж, хүүхэдтэй эергээр үр дүнтэй ажиллах чадавхыг бэхжүүлэх, хүүхдийн эрх, хөгжил, хамгааллын асуудлаар оролцогч талууд, олон нийтийн үүрэг, оролцоог нэмэгдүүлэх чиглэлээр сургалт нөлөөллийн ажлыг хамтран зохион байгуулна. 

БСШУСЯ-ны Төрийн нарийн бичгийн дарга Б.Баярсайхан, “Монгол Улсын Ерөнхийлөгч энэ оныг Хүүхэд хамгааллын жил болгон зарласан. Ерөнхий сайд Засгийн газрын түвшинд хүүхэд хамгааллын асуудалд нэлээд анхаарлаа хандуулж байна. Бид өнгөрсөн гуравдугаар сарын 15-нд Олон Улсын хэрэглэгчийн эрхийг хамгаалах өдрийг “Хүүхэд хэрэглэгч” уриан дор зохион байгуулж, хүүхдийн хоол хүнс, хувцас, цүнх хэрэглэлээс эхлээд шаардлага хангаж байгаа эсэхэд олны анхаарлыг хандуулах нөлөөллийн ажлыг хийсэн. Мөн хүүхдэд хориотой хүнс сурталчлах, буруу үлгэр дуурайлал үзүүлэх аливаа нэвтрүүлэг, сурталчилгааг 21:00 цагаас өмнө гаргахыг хориглох тухай холбогдох байгууллагуудтай санамж бичиг байгуулсан. Олон Улсын байгууллага, төрийн бус байгууллагуудтай энэ чиглэлээр хамтран ажиллах нь үр дүнтэй гэж үзэж байна. Санамж бичиг бол байгуулаад өнгөрдөг зүйл биш. Тодорхой зорилт дэвшүүлж, хөтөлбөр гарган хамтрагч талууд үүрэг хүлээн харилцан хэрэгжүүлж, хяналтаа тавьдаг” хэмээв.

Холбоотой мэдээ