Хятадын удирдагчдын хамаатнуудын нэрс “Панамын баримт бичиг”-т дурдагджээ

Дэлхийд | Улс төр
nyamtulga@montsame.mn
2016-04-08 08:29:14

БЭЭЖИН. /NHK/. БНХАУ-ын гурван дээд удирдагч, тэдний дотор дарга Си Зинпиний хамаатнууд “Панамын баримт бичиг” гэх оффшор дансны талаарх дуулианд нэр холбогдсон байна.

Олон улсын эрэн сурвалжлах сэтгүүлчдийн консорциум Панам дахь хууль зүйн зөвлөгөө өгдөг нэгэн компанийн дотоод мэдээллийг дэлгэжээ.

Дэлхийн улс төрийн удирдагчид, тэдний хамаатнууд болон бусад олон хүмүүс уг компаниар дамжуулан санхүүгийн оффшорын үйл ажиллагаа явуулж байжээ.

БНХАУ-ын Коммунист намын Улс төрийн товчооны байнгын хорооны гурван гишүүний хамаатнууд Их Британийн Виржинийн арлууд дахь оффшор компаниудад хувьцаа эзэмшдэг байна.

Хятадын дарга Си Зинпин, Коммунист намын тавдугаар удирдагч Лю Юншань, Төрийн зөвлөлийн Ерөнхий сайдын орлогч дарга Жан Гаоли нарын хамаатан саднуудын нэр “Панамын баримт бичигт” дурдагджээ.

Уг алдагдсан баримт бичигт орсон Хятадтай холбоотой мэдээллүүдийг эрх баригчид хааж, цахим хайлтыг блоклосон байна.

Д.Нямтулга

 

Холбоотой мэдээ