Австралийн уурхайгаас ховор алмааз олборложээ

ДЭЛХИЙН МЭДЭЭ | СОНИН ХАЧИН
khulan@montsame.gov.mn
2019-04-24 15:09:14

КАНБЕРРА. /ABC/. Австралийн баруун нутгийн Кимберли бүс нутгийн “Аргайл” алмаазын уурхайгаас тус уурхайн түүхэн дэх хамгийн том хэмжээтэй алмаазуудын нэгийг мягмар гарагт олборлосон байна.


28.84 карат, найман талт уг эрдэнийн чулууг “Аргайл Октавия” хэмээн нэрлэжээ. Ирэх 2020 онд үйл ажиллагаагаа зогсоох гэж буй “Аргайл” алмаазын уурхайгаас Австралийн нийт алмаазын 90 гаруй хувийг олборложээ.


36 жилийн түүхтэй энэхүү уурхайгаас 20-оос дээш карат жинтэй алмаазыг 20 орчим удаа олборлож байжээ. Түүнчлэн “Аргайл” уурхайгаас олборлосон хамгийн сүүлийн том хэмжээтэй эрдэнийн чулуу энэ байж магадгүй хэмээн таамаглаж байна.


“Бид ийм хэлбэр, өнгө, тунгалаг байдалтай эрдэнийн чулууг маш цөөн удаа харж байсан” гэж уурхайн үйл ажиллагаа хариуцсан ерөнхий менежер Эндрю Уилсон Австралийн төв телевизэд мэдээлжээ. 

Холбоотой мэдээ