12 сумын иргэд эрүүл мэндийн үзлэгт хамрагджээ

Орон нутагт | Өвөрхангай
sarantsetseg@montsame.gov.mn
2015-09-17 16:31:39

Өвөрхангай аймаг 2015 оныг “Эрүүл мэндийг дэмжих жил” болгон зарласан. Зорилтот жилийн хүрээнд нийт хүн амыг эрүүл мэндийн үзлэгт хамруулан эрүүлжүүлэх шийдвэрийг гарган ажиллаж байна.

Одоогийн байдлаар 12 сум, 7 багийн иргэдийг үзлэг, шинжилгээнд хамруулжээ. Хэдийгээр уг ажил иргэдийн сэтгэлд нийцэж, цаг хугацаа шаардахгүй, үнэ төлбөргүйгээр үзлэг оношилгоонд хамрагдаж байгаадаа талархаж байгаа ч зохион байгуулалтын хувьд тааруу байгааг удирдлагууд хэллээ. Зарим суманд багийн Засаг дарга нар, өрхийн эмч нар, нийгмийн ажилтнууд, эрүүл мэндийн салбарын ажилтнууд, ажлын хорооны гишүүдийн ажлын уялдаа холбоо муу байгаагаас иргэдэд хүндрэл чирэгдэл учруулах асуудал багагүй гарч байгаа юм.
Зорилтот жилийн ажлын төлөвлөгөөнд тусгасны дагуу сумдын эрүүл мэндийн байгууллагаас нийт иргэдээ анхан шатны үзлэгт хамруулж улмаар өвчлөлийг нарийн тодруулах шаардлагатай хүмүүсийг БОЭТ-ийн нарийн мэргэжлийн эмч нарын үзлэгт хамруулах ёстой. Мөн эрүүл мэндийн даатгалын шимтгэлээ төлж чаддаггүй, ажилгүй, орлогогүй иргэдийг үзлэгт хамруулахыг зорьж байгаа ч овсгоотой, танил талтай хүмүүс бүх үзлэгт хэдийн хамрагдчихсан, харин үзүүлэх шаардлагатай зарим хүмүүс учраа олохгүй хоцорчихсон байдгийг иргэд хэлж байгаа юм.

Б.Батчимэг

 

Холбоотой мэдээ
Сэтгэгдлүүд