Улаанбаатар
АСЕМ-ын Парламентын түншлэлийн уулзалтад 250 төлөөлөгч оролцоно
МОНГОЛЫН МЭДЭЭ
АСЕМ буюу Ази Европын уулзалт ирэх сарын 21-22-нд болох Парламентын түншлэлийн 9 дүгээр уулзалтаар эхэлнэ. Уг уулзалтын бэлтгэл ажлын талаар өнөөдөр УИХ-ын Тамгын газрын Ерөнхий нарийн бичгийн дарга Б.Болдбаатар, АСЕМ-ын Бэлтгэл ажлын албаны орлогч дарга Б.Баясгалан нар мэдээлэл хийв.
Парламентын түншлэлийн уулзалтыг “Ази Европын парламентын түншлэлийн АСЕМ дахь үүрэг” сэдвээр зохион байгуулах бөгөөд “Улс төр, эдийн засаг”, “Нийгэм соёл” гэсэн салбар хуралдаан болох юм. Уулзалтын урилгыг АСЕМ-ын гишүүн 51 орон, хоёр олон улсын байгууллагын Парламентын дарга нарт хүргүүлсэн хэмээн УИХ-ын Тамгын газрын Ерөнхий нарийн бичгийн дарга Б.Болдбаатар мэдээллийн эхэнд онцлон тэмдэглэв.
Тэрбээр, “Энэхүү уулзалтад оролцох төлөөлөгчийн бүртгэлийг энэ сарын 31 хүртэл зохион байгуулна. Одоогоор 23 орноос 100 гаруй төлөөлөгч ирэхээр бүртгүүлсэн байна. Түүний дотор 3 улсын Парламентын дарга, 6 улсын парламентын дэд дарга оролцоно гэдгээ мэдэгдсэн. Хурлын үеэр нийт 250 орчим төлөөлөгч оролцох төлөвтэй байна.
Бэлтгэл ажлын хүрээнд www.asep9.parliament.mn цахим хуудсыг ажиллуулж эхэлсэн. Уг цахим хуудсанд уулзалтын хөтөлбөр, хэлэлцэх асуудлын жагсаалт, байрлах зочид буудал, Монгол Улсын танилцуулга болон виз, онгоцны нислэг зэрэг мэдээллийг байршуулсан.
Парламентын түшнлэлийн уулзалтын дүрмийн дагуу энэ сарын 31-ний дотор ерөнхий болон салбар хуралдаанаар хэлэлцэх асуудлын жагсаалтыг гаргах ёстой. Хуралдааны зохион байгуулах хэсгээс ерөнхий хэлэлцэх асуудлын төслийг боловсруулсан бөгөөд ирэх 7 хоногт гишүүн орнуудад хүргүүлж, санал авахаар төлөвлөсөн. Парламентын уулзалтаар гарсан төслийн баримт бичгүүдийг АСЕМ-ын дээд хэмжээний уулзалтад зохион байгуулагч орны Парламентын дарга танилцуулна” хэмээв.
Бэлтгэл ажлын хүрээнд МИАТ компанитай хамтран Улаанбаатар-Берлин-Улаанбаатар чиглэлийн нислэгт тусгай захиалгат суудал бий болгожээ. Түүнчлэн Төрийн ордны Их танхим болон бусад танхмыг засварлаж эхэлсэн бөгөөд хуралдаан эхлэхэд олон улсын стандартад нийцсэн орчуулгын танхим, Хэвлэлийн төв ажиллах аж.
Ч.Ариунболд
Гэрэл зургийг Б.Чадраабал
