Улаанбаатар
Мал хулгайлах гэмт хэргийн талаар баруун бүсийнхэн зөвлөлдөж байна
ОРОН НУТГИЙН МЭДЭЭ | УВС
Увс /МОНЦАМЭ/. “Мал хулгайлах гэмт хэргээс урьдчилан сэргийлэхэд олон талт хамтын ажиллагааг бэхжүүлэх нь” сэдэвт баруун бүсийн зөвлөлгөөн өнөөдөр Улаангом хотноо болж байна.
Зөвлөлгөөнөөр малын генетик нөөцийн тухай болон мал амьтны эрүүл мэндийн тухай хуулийн хэрэгжилт, хил дамнасан малын хулгайг таслан зогсооход Монгол Улсын олон улсын гэрээ, хэлэлцээр, хууль тогтоомжийн хэрэгжилтийг хангах, хууль хяналтын байгууллага, орон нутгийн засаг захиргааны хамтын ажиллагаа, мал хулгайлах гэмт хэргээс урьдчилан сэргийлэхэд мэргэжлийн хяналтын байгууллагын оролцоо, иргэд, аж ахуйн нэгж, малчдын бүлэгтэй хамтран ажиллах, мал хулгайлах гэмт хэрэгтэй тэмцэх чиглэлээр хэрэгжүүлсэн ажил, арга хэмжээ, анхаарах асуудлуудын талаар Монгол Улсад Гэмт хэргээс урьдчилан сэргийлэх ажлыг зохицуулах зөвлөл болон ХХААХҮЯ, ХЗДХЯ, МХЕГ, ХХЕГ, ЦЕГ-ын төлөөллүүд илтгэл тавьж байна.
Энэ үеэр мөн Завхан, Говь-Алтай, Ховд, Баян-Өлгий, Увс аймгийн Цагдаагийн газрын дарга нар өөрийн аймгийн мал хулгайлах гэмт хэрэгтэй тэмцэх чиглэлээр хэрэгжүүлсэн ажил, арга хэмжээ, урьдчилан сэргийлэх ажлын талаар дэлгэрэнгүй мэдээлэл хийж байна.
Увс аймагт энэ оны эхний 9 сарын байдлаар өмчлөх эрхийн эсрэг гэмт хэргийн 32.3 хувийг малын хулгайн гэмт хэрэг эзэлж, өмнөх оны мөн үеэс энэ төрлийн гэмт хэрэг 11 гаралтаар буурсан үзүүлэлттэй байгаа аж.
Б.Батхүү
