Улаанбаатар
Хууль зүйн байнгын хороо Үндсэн хуулийн цэцийн дүгнэлтийг хүлээж авахаас татгалзав
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. УИХ-ын Хууль зүйн байнгын хорооны өнөөдрийн хуралдаанаар Үндсэн хуулийн цэцийн 10 дугаар дүгнэлтийг хэлэлцээд, хүлээж авах шаардлагагүй хэмээн үзлээ.
УИХ-ын гишүүн асан Д.Гантулга өөрийн хүсэлтээр гишүүнээсээ түдгэлзсэнээр Хэнтий аймагт нөхөн сонгууль явах шаардлага үүссэн. Үүний дагуу УИХ-аас 42 дугаар тойрогт нөхөн сонгууль товлон зарлах, санал авах өдрийг тогтоох тухай 62 дугаар тогтоол баталсан юм. Уг тогтоолд нөхөн сонгуулийг энэ сарын 07-нд зохион байгуулахаар тусгасан. Гэвч энэхүү тогтоолд төрийн албан хаагч оролцох зохицуулалтыг нарийн тусгаагүй нь иргэний сонгох, сонгогдох эрхийг хязгаарласан хэмээн Хэнтий аймгийн Баянхутаг сумын II багийн иргэн С.Мөнхцэцэг Үндсэн хуулийн цэцэд гомдол гаргасан юм. Үндсэн хуулийн цэц уг гомдлыг энэ оны 8 дугаар сарын 22-нд хэлэлцээд, УИХ-ын 62 дугаар тогтоол Үндсэн хууль зөрчсөн гэсэн дүгнэлт гаргасан.
Байнгын хорооны хуралдааны үеэр УИХ-ын гишүүн Л.Мөнхбаатар, Ц.Мөнх-Оргил нар Үндсэн хуулийн цэцийн дүгнэлтийг хүлээн авах нь зөв гэсэн санал хэлж байв. Өөрөөр хэлбэл, Сонгуулийн тухай хуульд Ерөнхийлөгч, УИХ болон орон нутгийн сонгуульд оролцох хүсэлтэй иргэн тухайн сонгуулийн жилийн нэгдүгээр сарын 31-нээс хойш ажил, албан үүргээ гүйцэтгээгүй байна хэмээн заажээ. Ингэхдээ нөхөн сонгуульд оролцох иргэд албан үүргээ хүлээлгэн өгөх хугацааг нарийн заагаагүйгээс үүдэн Үндсэн хуулийн цэцэд маргаан үүссэн гэдгийг гишүүд тайлбарлаад, Цэцийн дүгнэлтийг хүлээн авч, Сонгуулийн хуульд “нөхөн сонгуульд оролцох төрийн албан хаагч гурван сарын өмнө албан тушаалаа хүлээлгэн өгсөн байна” гэсэн заалт тусгах хэрэгтэй хэмээсэн юм.
Харин УИХ-ын гишүүн Д.Лүндээжанцан Сонгуулийн тухай хуулийг шинэчлэн найруулах ажлын хэсэгт ажиллаж байгаа бөгөөд энэ намрын чуулганаар батлуулахаар төлөвлөж байгаа гэлээ. Тэрбээр, “Одоо боловсруулж буй хуулийг намрын чуулганаар батлуулж амжихгүй хэмээн үзвэл гишүүд өөрсдөө нэмэлт, өөрчлөлтийн төсөл боловсруулах замаар дээрх асуудлыг шийдвэрлэх боломжтой” хэмээв.
Ийнхүү санал хураалт явуулахад хуралдаанд орсон гишүүдийн 92 хувь Үндсэн хуулийн цэцийн дүгнэлтийг хүлээж авах шаардлагагүй хэмээн үзэж, шийдвэрээ чуулганы нэгдсэн хуралдаанд танилцуулахаар тогтлоо.
