Г.Занданшатар: КОВИД-19 болон геополитикийн нөхцөл байдал иргэдэд хүнд цохилт өгч байна

МОНГОЛЫН МЭДЭЭ | УЛС ТӨР
ariunbold@montsame.gov.mn
2022-09-29 16:40:54

Улаанбаатар /МОНЦАМЭ/. Улсын Их Хурлын дарга Г.Занданшатар, Улсын Их Хурлын Төсвийн байнгын хорооны дарга Г.Тэмүүлэн нар өнөөдөр Олон улсын валютын сангийн төлөөлөгчидтэй уулзлаа.


Хоёр талын Зөвлөлдөх ажлын багийн уулзалтын үр дүнгийн талаар хэвлэлийн хурал өнөөдөр болсон. Монголыг хариуцсан ажлын багийн ахлагч Ангана Банержи уг хурлаар ОУВС-гаас өгсөн зөвлөмжийг танилцуулсан гээд уг зөвлөмжид дурдсан асуудлуудаар Улсын Их Хурлын даргад дэлгэрэнгүй мэдээлэл өглөө.


Улсын Их Хурлын дарга Г.Занданшатар хэлэхдээ, ирэх оны төсвийг удахгүй Улсын Их Хурлаар хэлэлцэнэ. Улс орны гадаад нөхцөл байдал хүндрэлтэй, дэлхий нийтэд хил гаалийн хязгаарлалт, хөл хорио, геополитикийн зөрчилдөөнтэй асуудлуудаас шалтгаалан инфляц, ханшийн дарамт, экспортын хүндрэл гээд олон асуудал Монгол Улсын эдийн засагт тулгарч байна. Эдийн засгийн хүндрэл, үнийн өсөлт манай иргэдийн амьдралд хүнд цохилт болж байна. Төсвийн бодлогын шинэчлэлийн асуудлыг нээлттэй хэлэлцүүлж, төсвийн хэлэлцүүлгийн ил тод байдлыг хангахад Улсын Их Хурлаас онцгойлон анхаарч байна. Мөн зардлыг бууруулах, зайлшгүй авах арга хэмжээг тууштай хэрэгжүүлэх хэрэгтэй байна. Үүний тулд халамжийг зөвхөн зорилготой болгох, хэмнэлтийг хөдөлмөр эрхлэлтийг дэмжихэд чиглүүлэх, хөдөлмөр эрхлэлттэй уялдуулах шаардлагатай гэж үзэж байна гэлээ.


Хатагтай Ангана Банержи ирэх жилийн төсвийн төсөлд тусгагдсан зарим зорилтуудыг ОУВС-гийн зүгээс дэмжиж байгаагаа илэрхийлж, төрийн болон төрийн өмчит үйлдвэрийн газарт олгох хөрөнгө оруулалтыг багасгах, нэн шаардлагатай төсөл хөтөлбөрийг эрэмбэлэн хэрэгжүүлэх, тэдгээрийг нийтэд ил тод болгох шаардлагатай гэлээ. Тэрбээр, ирэх жилийн төсвийн төслийг харахад нөхцөл байдал хүнд байхаар байна. Тиймээс Засгийн газар болон Улсын Их Хурал холбогдох зохицуулалтын арга хэмжээг авах зайлшгүй шаардлагатай. Тухайлбал, валютын нөөцийн хомсдолоос хамаарч, инфляц өсөхөөр байгаа тул валютын эрэлтийг хязгаарлах нь чухал гэсэн юм хэмээн Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.

Related news