Улаанбаатар
Хурдан морь унаач хүүхдийн хувцас стандартад нийцэхгүй байгааг шүүмжлэв
ОРОН НУТГИЙН МЭДЭЭ | БАЯН-ӨЛГИЙ
Баян-Өлгий /МОНЦАМЭ/. Хурдан морь унаач хүүхдүүдийг стандартад нийцсэн хамгаалалтын хувцастай болгох шаардлагатайг аймгийн Гэр бүл, хүүхэд, залуучуудын хөгжлийн газрын улсын байцаагч Х.Алия өнөөдөр Өлгий хотод болж буй "Монгол уяач-3000" зөвлөлгөөний үеэр илэрхийллээ.
Баян-Өлгий аймагт 2000 гаруй хүн морь уяж хурдлуулдаг байна. Ихэнх уралдаануудад хүүхдүүд хамгаалалтын хувцасгүй, зарим нь роликийн зориулалттай өвдгөвч, тохойвч зэрэг шаардлага хангахгүй хувцастай оролцдог аж. Аймгийн нутаг дэвсгэрт зохион байгуулсан хурдан морины уралдаануудад хүүхэд амь эрсэдсэн, хүнд бэртсэн тохиолдол одоогоор байхгүй ч болзошгүй эрсдэл, хүүхдийн эрх зөрчигдөхөөс урьдчилан сэргийлэх, эрүүл мэндийг хамгаалах үүднээс цаашид уяачид стандартад нийцсэн хувцастай болгох асуудалд онцгой анхаарахыг тэрээр хүслээ.
Монголын Морин Спорт, Уяачдын Холбооны тэргүүний үүрэг гүйцэтгэгч М.Мөнхбаясгалан тэргүүтэй хүмүүс өнөөдөр Баян-Өлгий аймгийн уяачидтай уулзан зөвлөлдөж байгаа юм. Зөвлөлгөөнд аймгийн төв болон сумдын 50 гаруй уяач оролцож байгаа ба Үндэсний баяр наадмын тухай хуулийн нэмэлт өөрчлөлтийн төсөлд оруулах санал, морин спортыг хөгжүүлэх, орон нутгийн уяачдад тулгамдсан асуудлууд, уяачид болон унаач хүүхдүүдийг алдаршуулах зэрэг асуудлуудыг хэлэлцэж байна.
Ө.Нурболат
