Улаанбаатар
Завхан аймаг иргэдийнхээ санхүүгийн боловсролыг дээшлүүлэхэд анхаарна
ОРОН НУТГИЙН МЭДЭЭ | ЗАВХАН
Завхан/МОНЦАМЭ/. Завхан аймгийн Засаг дарга Д.Батсайхан аймагтаа үйл ажиллагаагаа явуулж буй банкны захирлуудтай “Өглөөний цай” уулзалт зохион байгууллаа. Уулзалтын үр дүнд банкуудтай хамтарсан иргэдийн санхүүгийн боловсролыг дээшлүүлэх цуврал сургалтуудыг хийхээр болжээ.
Мөн “Оюунлаг Завханчууд” хөтөлбөрийн хүрээнд аймгийн ерөнхий боловсролын сургуулиудын 10-12 дугаар ангийн сурагчдын дунд санхүүгийн анхан шатны боловсрол олгох зорилготой мэтгэлцээн, илтгэл, эссэ бичлэгийн уралдааныг банкуудтай хамтран явуулахаар болжээ. Энэхүү уралдааныг 2018 оны 01 сарын 01-ний өдрөөс 05 сарын 01-ний өдөр хүртэлх хугацаанд зохион байгуулж уралдаанд тэрүүлсэн сурагчдад мөнгөн шагнал олгож 12 дугаар ангийн сурагчдад сургалтын тэтгэлэг олгохоор боллоо. Түүнчлэн банкуудтай хамтран үйлдвэрлэлийн тоног төхөөрөмжийн лизингийн үзэсгэлэн худалдааг жилд хоёр удаа зохион байгуулах, банкууд сард нэг удаа “Иргэдээ сонсох аян”-ыг зохион байгуулж харилцагчаа сонсдог байх, Нэг цонхны үйлчилгээг өргөжүүлж банкууд үйл ажиллагаагаа явуулдаг болох зэрэг саналыг дэвшүүлж хамтран ажиллахаар болжээ.
Энэхүү “Өглөөний цай” уулзалт, ярилцлагыг цаашид сард нэг удаа салбар бүрээр тогтмол зохион байгуулахаар төлөвлөснөө дуулгалаа.
Б.Мягмарсүрэн
