“УИД” ХК-ийг Санхүүгийн зохицуулах хороо шүүхэд өглөө
Монголын мэдээ“УИД” ХК-ийн жижиг хувьцаа эзэмшигчдийн өмнөөс Санхүүгийн зохицуулах хороо шүүхэд нэхэмжлэл гаргажээ.
"УИД” ХК хувьцаа эзэмшигчдийнхээ эрх ашгийг хохироож байгаа талаар жижиг хувьцаа эзэмшигчид удаа дараа гомдол гаргаж байсан. Тэдний гомдлын дагуу Санхүүгийн зохицуулах хорооноос энэ оны хоёр ба дөрөвдүгээр сард шалгалт явуулсаны дүнд шүүхэд нэхэмжлэл гаргажээ. Ингэхдээ “УИД” ХК-ийн холбогдох этгээдүүд болох “Номин холдинг”, “Номин тав”, "Номин реалтор” компаниудын хооронд хийсэн гүйлгээ, гэрээ хэлцэл бүрийг санхүүгийн баримт, үндсэн гэрээнүүдэд тулгуурлан шалгалтыг явуулсан байна. Шалгалтаар “Номин холдинг” группын гишүүн компаниудын хооронд хийсэн гэрээ, хэлцлүүд, эдгээрийн үндсэн төлбөр тооцоо нь зарим талаар сонирхолын зөрчилтэй, жижиг хувьцаа эзэмшигчдийн хувьд ашиггүй дүр үзүүлсэн гэрээ хийсэн байх магадлалтай гэсэн дүгнэлт гарсан аж. Тухайлбал, 2008 оноос хойш хийсэн түрээсийн болон зээлийн нийт 13 гэрээг хүчин төгөлдөр гэрээ, хэлцэл мөн эсэх нь эргэлзээтэй байгаа гэнэ. Эдгээр гэрээг хүчин төгөлдөр үү гэдгийг тогтоолгохоор жижиг хувьцаа эзэмшигчдийн эрх ашгийг өмнөөс Санхүүгийн зохицуулах хороо шүүхэд нэхэмжлэл гаргалаа.
Жижиг хувьцаа эзэмшигчид шүүхэд нэхэмжлэл гаргахад төлөх тэмдэгтийн хураамж өндөр гардаг. Иймд хувьцаа эзэмшигчдийн эрх ашгийг хамгаалах үүргийг СХЗ хүлээдэг учраас тус хороо тэдний өмнөөс нэхэмжлэл гаргажээ. Тэмдэгтийн хураамжийн тухай хуульд зааснаар төрийн байгууллагын гаргаж буй нэхэмжлэлд хураамж төлдөггүй.
“УИД” ХК 100 төгрөгийн нэрлэсэн үнэ бүхий нийт 36,807,850 ширхэг энгийн хувьцаатай. Үүнээс томоохон хувьцаа эзэмшигч нь нийт хувьцааны 68.4 хувийг эзэмшдэг. Үлдсэн хувийг 45,415 жижиг хувьцаа эзэмшигчид эзэмшдэг. Тус хувьцаат компани нь 2001 онд 30 мөнгө, 2007 онд 3 төгрөгийн ногдол ашиг хуваарилаж байсан. Харин бусад жилүүдэд алдагдалтай ажилласан гэх шалтгаанаар ногдол ашиг хуваарилаагүй аж.
Б.Туул
Сэтгэгдлүүд