Улаанбаатар /МОНЦАМЭ/."Алтан гадас" одонт Цэргийн төв эмнэлэг Монгол Улсын Ерөнхийлөгчийн зарлигаар төрийн дээд шагнал "Цэргийн гавьяаны улаан тугийн одон"-оор шагнууллаа.

Шагнал гардуулах ёслолын ажиллагаанд УИХ-ын гишүүн, Засгийн газрын гишүүн Батлан хамгаалахын сайд Б.Бат-Эрдэнэ, Монгол Улсын Ерөнхийлөгчийн Аюулгүй байдал, Батлан хамгаалах бодлогын зөвлөх А.Баттөр, ЗХЖШ-ын дарга дэслэгч генерал Д.Даваа, БХЯ-ны стратеги бодлого төлөвлөлтийн газрын дарга бригадын генерал Х.Сайханбаяр, ТЗУГ-ын дарга, хурандаа Д.Мөнх-Очир, Цэргийн төв эмнэлгийн дарга, ерөнхий эмч, хурандаа С.Батболд болон БХЯ, ЗХЖШ-ны удирдлагууд оролцлоо.

Батлан хамгаалахын сайд Б.Бат-Эрдэнэ шагнал гардуулах үеэр хэлсэн үгэндээ "Цэргийн эмнэлэг нь улс орны хэмжээнд нийтийг хамарсан гамшиг, осол, өвчлөлийн үед улсын эрүүл мэндийн салбарт томоохон дэмжлэг үзүүлэхийн зэрэгцээ, Даян дэлхийд энх тайвныг тогтоох үйлсэд оролцож, Бүгд Найрамдах Судан Улсын ДАРФУР мужид явж буй НҮБ, Африкийн холбооны хамтарсан энхийг сахиулах ажиллагаанд "Цэргийн хээрийн II шатны эмнэлгийн баг"-ууд Монгол Улс, Зэвсэгт хүчнийхээ нэр хүндийг өндөрт өргөн, тавьсан үүргээ чадварлаг гүйцэтгэсээр ирсэн гэдгийг энд тэмдэглэн хэлэхэд нэн таатай байна. Үүний тод жишээ нь нийслэл хотын хэмжээнд хүүхдийн амьсгалын замын өвчлөл нэмэгдэж, онцгой хүндрэлтэй нөхцөл байдал үүссэнтэй холбогдуулан Цэргийн төв эмнэлгийг түшиглэн байгуулсан "Хүүхдийн тасаг" бөгөөд Эрүүл мэндийн яамны хүсэлтээр зүүн бүсийн аймгууд, зарим дүүргийн иргэдэд тодорхой чиглэлээр эрүүл мэндийн тусламж, үйлчилгээ үзүүлэх үүргийг үе шаттайгаар хэрэгжүүлэхээр төлөвлөн ажиллаж байгаа" хэмээн дурьдаад төр, ард түмнийхээ өмнө өргөсөн хос тангарагтаа үнэнчээр зүтгэж буй цэргийн эмч, эмнэлгийн ажилтан Та бүхний улсыг батлан хамгаалах болон ард олныхоо эрүүл мэндийг сахиулах үйлсэд тань улам их амжилт гаргахыг хүсэж, Ерөнхийлөгчийн зарлигаар "Цэргийн гавьяаны улаан туг"-ийн одонгоор шагнуулсанд дахин баяр хүргэлээ. 

Цэргийн төв эмнэлэг 1921 онд байгуулагдаж цэргийн албан хаагчдад төдийгүй ард иргэдэд эмнэлгийн тусламж үзүүлж ирсэн. Мөн 1939 оны Халхын голын байлдаан, 1945 оны чөлөөлөх дайнд Монгол Ардын цэргийн бүрэлдэхүүнд оролцож үүргээ амжилттай биелүүлжээ. Өдгөө тус эмнэлэг цэрэг, цагдаа, төрийн тусгай албан хаагчид, тэдний гэр бүл, ахмад дайчид, нийслэлийн Баянзүрх, Налайх, Багахангай дүүргийн иргэдэд эрүүл мэндийн үзлэг хийж, эмнэлгийн тусламж үзүүлж байна.

Мөн НҮБ-ын энхийг сахиулах үйл ажиллагаанд давхардсан тоогоор 350 гаруй эмч, эмнэлгийн ажилтан оролцон үүрэг гүйцэтгэжээ.

Тус эмнэлэг галт зэвсэгт шархадсан, химийн болон ахуйн хорт бодист хордсон иргэдэд эмнэлгийн яаралтай туслалцаа үзүүлдэг бөгөөд ОХУ, БНХАУ, Энэтхэг, Япон, БНСУ, ХБНГУ зэрэг оронтой хамтран ажиллаж эмч нарынхаа мэргэжлийг дээшлүүлж байна.

Тус эмнэлгээс Монгол Улсын баатар 1, Ардын эмч 4, Хүний гавьяат эмч наймыг төрүүлсэн бахархам түүхтэй Монгол Улсын ууган эмнэлэг юм. Ийнхүү тус эмнэлэг хос одонтой анхны эмнэлэг боллоо.

Ж.Батсайхан