Улаанбаатар
Увс аймгийн аварга шатарчид тодорлоо
ОРОН НУТГИЙН МЭДЭЭ | УВС
Монгол Улсын Их Хурлын даргын ивээл дор жил бүр уламжлан болон зохион байгуулдаг шатар сонирхогчдын Улсын аварга шалгаруулах тэмцээн энэ жил Монгол Улсын шинэ Үндсэн хууль батлагдсаны 25 жилийн ойтой давхцаж өргөн дэлгэр боллоо.
Увс аймгийн ИТХ, аймгийн Шатрын холбоо, “Уран сэтгэмж” шатрын клубтэй хамтран энэ удаагийн Шатар сонирхогчдын аймгийн аварга шалгаруулах тэмцээнийг 12-р сарын 10-11-ний өдрүүдэд амжилттай зохион байгуулж дүнгээ гаргалаа. Тэмцээнд Шатар сонирхогчдын сумын аварга шалгаруулах тэмцээнд эхний 3 байр эзэлсэн эрэгтэй шатарчид, эхний байр эзэлсэн эмэгтэй шатарчид, мөн Улаангом сумын аварга шалгаруулах тэмцээнд амжилттай оролцсон тамирчдыг хамруулсан бөгөөд нийт эрэгтэй 50, эмэгтэй 7 шатарчин 2 өдрийн турш оюун ухаанаа уралдуулан өрсөлдсөн юм.
Эрэгтэй тамирчид Швейцарь системээр 9 өрөг тоглосноос Улаангом сумын Цогцолбор 1-р сургуулийн математик, мэдээлэл зүйн багш Ц.Цэдэвсүрэн 7,5 оноогоор тэргүүн байр, Улаангом сумын харъяат, малчин Б.Нацаг 7,5 оноогоор 2-р байр, Улаангом сумын иргэн Б.Аръяа 7 оноогоор 3-р байрт тус тус шалгарлаа.
Эмэгтэй шатарчид тойргоор тоглосноос Түргэн сумын сургуулийн номын санч Ц.Наранмандах хожигдолгүй түрүүлсэн бол Улаангом сумын иргэн С.Аюуш 4 оноогоор 2-р байр, Б.Цэрэнжаргал 3-р байрт шалгарсан юм.
Эрэгтэй тамирчдаас эхний 6 байрт шалгарсан тамирчдад өргөмжлөл, мөнгөн шагнал мөн сайн тоглосон өндөр настай нэг тамирчныг өргөмжлөл мөнгөн шагналаар шагнасан бол эмэгтэй тамирчдаас эхний 4 байрыг шалгаруулан өргөмжлөл мөнгөн шагналаар шагналаа.
Уг тэмцээнээс эрэгтэйчүүдийн төрөлд эхний хоёр, эмэгтэйчүүдийн төрөлд нэгдүгээр байрт шалгарсан тамирчдад Үндсэн хуулийн өдөр Шатар сонирхогчдын Улсын аварга шалгаруулах тэмцээнд оролцох эрхийн бичгийг гардуулсан юм.
Тэмцээнд эрэгтэй болон эмэгтэй төрөлд түрүүлсэн тамирчид төрсөн ах дүү хоёр, эрэгтэй төрөлд 2, 3-р байр эзэлсэн тамирчид мөн төрсөн ах дүү хоёр байсан онцлог үйл явдал болсон юм.
Тэмцээний ерөнхий шүүгчээр аймгийн Шатрын холбооны тэргүүн М.Энхболд, “Уран сэтгэмж” шатрын клубын багш М.Дэлгэрдалай нар ажиллав.
Б.Батхүү
