Улаанбаатар
ДОРНОГОВЬ: Зүүнбаянгийн ерөнхий боловсролын сургуулийн 70 жилийн ой тохиолоо
ОРОН НУТГИЙН МЭДЭЭ | ДОРНОГОВЬ
Сайншанд, 2024 оны есдүгээр сарын 16 /МОНЦАМЭ/. Дорноговь аймгийн Сайншанд сумын Зүүнбаянгийн ерөнхий боловсролын сургуулийн 70 жилийн ой энэ оны наймдугаар сарын 24-нд тохиолоо.
Тус сургууль 1954 онд анх хоёр гэрт бага сургуулийн зориулалтаар хичээл сургалтын үйл ажиллагаагаа эхэлж байсан бол 1957 онд долоон жилийн сургууль, 1965 онд найман жилийн сургууль, 1981 онд 10 жилийн сургууль болон өргөжжээ.
Харин 2001 онд дотуур байртай, бүсийн төвийн 10
жилийн сургууль, 2005 онд бүсийн төвийн 11 жилийн дунд сургууль, 2008
онд 12 жилийн сургалттай сургууль, 2013
онд Дорноговь аймгийн Сайншанд сумын ерөнхий
боловсролын IV сургууль, 2018 оноос Зүүнбаянгийн ерөнхий боловсролын сургууль болон үйл ажиллагаагаа явуулж байна.
2024-2025 оны хичээлийн жилд таван удирдах ажилтан, 26 багш, 19 ажилтантай үйл ажиллагаа явуулж байна. Бага ангид 222, дунд анги 134, ахлах ангид 50, нийт 17 бүлэгт 406 суралцагч суралцаж буй. Дотуур байранд 1-12 дугаар ангийн 22 суралцагч амьдардаг.
Дорноговь аймгийн Хатанбулаг, Хөвсгөл, Улаанбадрах сумаас
суралцагчид ирж ахлах ангидаа суралцдаг бүсийн сургууль юм. 2020 оны элсэлтийн
ерөнхий шалгалтын дундаж оноогоор аймагтаа дэд байрт шалгарч, аймгийн тэргүүний
сургууль болж байсан бол 2023 оны элсэлтийн ерөнхий шалгалтын дундаж оноогоор
аймагтаа тэргүүн байрт жагсжээ.
