Улаанбаатар
Ахмад шатарчдын Азийн аварга шалгаруулах тэмцээн маргааш эхэлнэ
МОНГОЛЫН МЭДЭЭ | СПОРТ
Улаанбаатар, 2024 оны наймдугаар сарын 9 /МОНЦАМЭ/. Ахмад шатарчдын Азийн аварга шалгаруулах тэмцээнийг манай улсад анх удаа зохион байгуулж байна.
13 дахь удаагаа зохион байгуулж буй тус тэмцээн маргааш нээлтээ хийх бөгөөд есөн орны 80 орчим ахмад шатарчин оюун ухаанаа уралдуулахад бэлэн болжээ. “World terelj resort” зочид буудалд болох энэхүү тэмцээнд оролцогчид 50 болон 65-аас дээш насны ангиллаар есөн өдрийн турш өрсөлдөж, аваргуудаа тодруулах юм. Тэмцээний талаар Монголын шатрын холбооны ФИДЕ төлөөлөгч, Дэлхийн шатрын холбооны глобал бодлогын зөвлөлийн гишүүн, их мастер А.Энхтуулаас тодрууллаа.
-Энэхүү
тэмцээнийг Монголд зохион байгуулснаараа ямар ач холбогдолтой вэ?
-Манай улсад анх удаа зохион байгуулж буй уг тэмцээний хүрээнд олон улсын цол, зэрэг олгох боломж бүрдсэн. Тиймээс Монголын шатарчид өсөн дэвжих, туршлага хуримтлуулах боломжтой. Мөн эх орныхоо гайхам сайхан байгаль, өв соёлыг орон орны шатарчдад таниулах зэрэг давхар ач холбогдолтой юм.
-Манай улсаас
хэдэн тамирчин оролцох вэ?
-Тэмцээнд оролцох 80 шатарчны 57 нь манай тамирчин бий.
-Гадаад 20
гаруй шатарчин ирэх юм байна. Хэр өндөр чансаатай шатарчид өрсөлдөх бол?
-Олон улсын мастер, Казахстаны шатарчин Найсибуллин Владислав оролцогчдын чансааг тэргүүлж байна. Түүнчлэн ахмадын дэлхийн аварга, их мастер Галина Струтинская, Филиппиний шатарчин, ахмадын Азийн аварга, олон улсын мастер мастер Хосе Эфрен Багамасбад зэрэг шатарчид оролцоно.
-2024 он
дуусахад дөрөвхөн сарын хугацаа үлджээ. Манай шатарчдыг энэ онд ямар тэмцээн
хүлээж байна вэ?
-Ирэх сард Унгарын Будапешт хотноо болох дэлхийн шатрын олимпиадад оролцохоор бэлтгэлээ базааж байна. Мөн Италид эхлэх өсвөрийн шатарчдын дэлхийн аварга шалгаруулах тэмцээнд Монголын тамирчид оролцоно. Харин 2025 оны тавдугаар сард Азийн бүсийн гурван тэмцээнийг эх орондоо зохион байгуулах эрх авсан. Энэхүү тэмцээн нь нас харгалзахгүй оролцох боломжтой бөгөөд дэлхийн цомын аварга шалгаруулах тэмцээнд оролцох эрх олгодог. Мөн өсвөрийн шатарчдын ЗААШТ-ийг зохион байгуулна.
Мэдээг бэлтгэсэн Д.Халиунаа
