Улаанбаатар
Эмнэлгүүд эрт илрүүлгийн үзлэгийг эрчимжүүлнэ
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Эрүүл мэндийн яам Нийгмийн эрүүл мэндийн үндэсний төвтэй хамтран ард иргэдийн дунд зохион байгуулж буй урьдчилан сэргийлэх, эрт илрүүлэх үзлэг, шинжилгээ, оношилгоог эрчимжүүлэх чиглэлээр хяналт явуулж байна.
ЭМЯ-ны НЭМГ-ын ХБӨ-ий хэлтсийн дарга Г.Ганхуягаар
ахлуулсан ажлын баг Улсын хоёрдугаар төв эмнэлэг, Улаанбаатар Төмөр замын төв
эмнэлэг, Хан-Уул, Чингэлтэй дүүргийн Эрүүл мэндийн төвд энэ сарын 5-6-нд ажиллаж, урьдчилан сэргийлэх, эрт илрүүлэх үзлэг, шинжилгээ, оношилгооны явцтай танилцан
мэргэжил арга зүйн зөвлөгөө өгч, тулгарч буй асуудлыг шийдвэрлэхэд дэмжлэг үзүүлэв.
Монгол Улсын Засгийн газрын 2022 оны гуравдугаар сарын 23-ны хуралдааны 17 дугаар тэмдэглэлээр тухайн оны тавдугаар сарын 1-нээс эхлэн нийт хүн амыг нас, хүйс, эрүүл мэндийн эрсдэлд суурилсан зонхилон тохиолдох халдварт болон халдварт бус өвчнөөс урьдчилан сэргийлэх, эрт илрүүлэх үзлэг, шинжилгээ, оношилгоонд хамруулах шийдвэр гарсан. Энэхүү шийдвэртэй холбогдуулан Эрүүл мэндийн сайдын 2022 оны А/139 дүгээр тушаал, Эрүүл мэндийн даатгалын үндэсний зөвлөлийн 2022 оны 06 тоот тогтоолын дагуу урьдчилан сэргийлэх, эрт илрүүлэх үзлэг, шинжилгээ, оношилгоог зохион байгуулж буй.
Өнгөрсөн хугацаанд буюу 2022 оны тавдугаар сарын 1-нээс энэ оны гуравдугаар сарын 30-ныг хүртэл эрт илрүүлэг үзлэгт улсын хэмжээнд 932 069 хүн хамрагдаад байна.
Үүний 421 483 буюу 45.2 хувь нь эрэгтэй, 510 586 буюу
54.8 хувь нь эмэгтэйчүүд байна. Байршлаар нь авч үзвэл 467 634 буюу
50.2 хувь нь Улаанбаатар хотод, 464 435 буюу 49.8 хувь нь орон нутгийн иргэд эрт
илрүүлэгт хамрагджээ.
Үзлэгт хамрагдсан хүмүүсийн 62.0 хувь нь 17 хүртэлх насныхан, 38.0 хувь
нь 18-аас дээш насныхан аж. 
