Улаанбаатар
ОХУ үнийн дээд хязгаарыг мөрдөж буй орнуудад газрын тос экспортлохгүй
ДЭЛХИЙН МЭДЭЭ | УЛС ТӨР
МОСКВА. /VOA/. ОХУ энэ сарын эхнээс хэрэгжиж эхэлсэн газрын
тосны үнийн дээд хязгаар тогтоохыг зөвшөөрсөн орнуудад газрын тос экспортлохыг
хориглоно гэж тус улсын Ерөнхийлөгч Владимир Путин мягмар гарагт мэдэгджээ.
“Оросын газрын
тос, газрын тосны бүтээгдэхүүнийг гадаадын хуулийн этгээд, хувь хүмүүст нийлүүлэх
гэрээнд үнийн дээд хязгаарыг ашиглаж байгаа тохиолдолд экспортлохыг хориглоно”
гэж Кремлийн цахим хуудсанд нийтэлсэн ерөнхийлөгчийн зарлигт тэмдэглэсэн байна.
Уг зарлигийг “АНУ
тэргүүтэй улс орнууд, олон улсын байгууллагуудын найрсаг бус, олон улсын хууль
тогтоомжид харшлах үйлдлүүд”-ийн хариу арга хэмжээ болгон гаргаж байгаа талаар “Reuters” агентлаг мэдээлжээ.
Канад, Франц,
Герман, Итали, Их Британи, АНУ болон Европын Холбооноос бүрддэг “Долоогийн
бүлэг”-ийн орнууд энэ сарын эхээр газрын тосны үнэд дээд хязгаар тогтоох
тохиролцоонд хүрсэн юм.
“Үнийн дээд
хязгаарыг тогтоосон нь гурван зорилготой. Нэгдүгээрт, хориг арга хэмжээний үр
нөлөөг чангатгах, хоёрдугаарт, Оросын орлогыг улам хязгаарлах, гуравдугаарт,
дэлхийн эрчим хүчний зах зээлийг тогтворжуулах юм” гэж Европын Комиссын тэргүүн
Урсула фон дер Ляйен талууд тохиролцоонд хүрсний дараа мэдэгдэж байв.
Харин Оросын тал
газрын тосны үнийн дээд хязгаар нь Украин дахь цэргийн ажиллагаанд нөлөөлөхгүй
хэмээгээд, газрын тосны бүтээгдэхүүнүүддээ шинэ худалдан авагч олно гэдэгтээ
итгэлтэй байгаагаа илэрхийлсэн байна.
Саудын Арабын
дараа орох дэлхийн хоёр дахь том газрын тос экспортлогч орон болох Орос улс
хориг арга хэмжээ хоёрдугаар сарын 1-нээс долоодугаар сарын 1-ны хооронд
хэрэгжинэ гэж мэдэгджээ.
