“Долоогийн бүлэг”-ийн Уур амьсгал, эрчим хүч, байгаль орчны сайд нар уулзаж байна

ДЭЛХИЙН МЭДЭЭ | УЛС ТӨР
khulan@montsame.gov.mn
2022-05-27 09:45:42

БЕРЛИН. /NHK/. “Долоогийн бүлэг”-ийн орнуудын Уур амьсгал, эрчим хүч, байгаль орчны сайд нарын уулзалт Германы Берлин хотноо пүрэв гарагт эхэллээ. Энэхүү уулзалтаар гишүүн орнууд Оросын эрчим хүчнээс хамааралтай байдлаа бууруулах талаар хэлэлцэнэ.


Германы Эдийн засаг, уур амьсгалын асуудал эрхэлсэн сайд Роберт Хабек уулзалтыг угтан хийсэн мэдэгдэлдээ, “Долоогийн бүлэг”-ийн орнууд эрчим хүчний хангамжийг тогтвортой байлгах, уур амьсгалын өөрчлөлттэй тэмцэх арга замын талаар хэлэлцэнэ гэдгийг тодотгожээ.


“Долоогийн бүлэг” Оросын нүүрс, нефтийн импортыг хориглох, үе шаттайгаар халах талаар хэдийнээ тохиролцоонд хүрээд байгаа ч тодорхой тов гаргасан зөвшилцөлд хүрээгүй байгаа юм. Европын орнууд, тэр дундаа Герман, Итали нь Оросын байгалийн хийнээс ихээхэн хамааралтай. Япон улс ч мөн тус улсаас байгалийн хий импортолдог.


Уулзалтын хэлэлцэх сэдэвт мөн нүүрсний цахилгаан үйлдвэрлэлийг зогсоох асуудал багтаж байна. Одоогоор Их Британи, Герман зэрэг “Долоогийн бүлэг”-ийн таван орон нүүрсний цахилгаан станцын үйл ажиллагаагаа зогсоох төлөвлөгөөгөө танилцуулаад байгаа юм.


Байгалийн баялгийн нөөц багатай Япон улсын хувьд нүүрсэн цахилгаан станцуудаас ялгарах нүүрстөрөгчийн давхар ислийн ялгарлыг бууруулахад шинэ технологиудыг ашиглахаар төлөвлөж байгаа талаараа танилцуулна. 

Холбоотой мэдээ