Улаанбаатар
УИХ-ын гишүүн Д.Цогтбаатар ЕАБХАБ-ын Парламентын ассамблейн өвлийн хуралдаанд оролцож байна
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Бүгд Найрамдах Австри Улсын Вена хотноо болж буй Европын аюулгүй байдал, хамтын ажиллагааны байгууллага (ЕАБХАБ)-ын Парламентын Ассамблейн 21 дэх өвлийн хуралдаанд УИХ-ын гишүүн, УИХ дахь Монгол-ЕАБХАБ-ын Парламентын Ассамблейтай харилцах бүлгийн дарга Д.Цогтбаатар оролцож байна.
Ассамблейн хуралдаанд ЕАБХАБ-ын гишүүн 57 улсын 120 гаруй парламентчид оролцож байгаа бөгөөд өнөөдрийн хуралдаанаар бүс нутагт тулгамдаж буй улс төр, аюулгүй байдлын хурцадмал асуудал, тэр дундаа Украинд эхлээд буй зэвсэгт мөргөлдөөн, зөрчлийн талаар хэлэлцүүлэг өрнөв.
Хуралдааны үеэр УИХ-ын гишүүн Д.Цогтбаатар Италийн Парламентын төлөөлөгчдийн тэргүүн Паоло Гримолдитэй уулзаж, ЕАБХАБ-ын Парламентын Ассамблейн хүрээнд харилцаагаа өргөжүүлэх, хамтран ажиллах тодорхой чиглэлүүдийн талаар санал солилцов. Италийн Парламентын төлөөлөгчдийн тэргүүн Паоло Гримолди Улаанбаатар хотноо ажиллаж, парламентын хамтын ажиллагааг бэхжүүлэх сонирхлоо илэрхийлэв. Мөн УИХ-ын гишүүн Д.Цогтбаатар Беларусийн Парламентын төлөөлөгчдийн тэргүүн Андрей Савинихтэй цахим уулзалт хийж, парламентдын харилцаа, хамтын ажиллагааг дэмжин ажиллах талаар ярилцсан байна.
Түүнчлэн энэ өдөр УИХ-ын гишүүн Д.Цогтбаатар Шведийн Стокхольм хотод төвтэй Ардчилал, сонгуульд дэмжлэг үзүүлэх олон улсын хүрээлэнгийн зөвлөхүүдийн зөвлөлийн (төлөөлөн удирдах зөвлөл) уулзалтад тус зөвлөлийн гишүүний хувиар анх удаа цахимаар оролцож, зөвлөлийн гишүүнээр ажиллах хугацаандаа тэргүүлэх чиглэл болгон ажиллах асуудлаа танилцуулж, санал солилцов.
