Улаанбаатар
“Төвийн бүсийн түншлэл-2021” үзэсгэлэн худалдаа гурван өдөр үргэлжилнэ
ОРОН НУТГИЙН МЭДЭЭ | ДАРХАН-УУЛ
Дархан-Уул /МОНЦАМЭ/. 21 дэх жилдээ зохион байгуулж буй “Төвийн бүсийн түншлэл” үзэсгэлэн
худалдаа өнөөдөр эхэллээ. Гурван өдрийн турш Найрамдал талбай болон Спортын
ордонд үргэлжлэх уг үзэсгэлэн худалдаанд 60 гаруй иргэн, ААНБ бүртгүүлсэн аж.
Дотор
талбайд хүнсний бүтээгдэхүүн, хувцас, номын худалдаа болон төрийн байгууллагын
үйлчилгээ иргэдэд хүрч байна. Гадаа талбайд төмс, хүнсний ногоо, модны суулгац
зэргийг худалдаалж эхэллээ.
Худалдаа
эрхлэгчдээс ирсэн хүсэлтийг харгалзан үзэж, цар тахлын үеийн халдвар хамгааллын дэглэмийг сахиж нийт оролцогчдыг
шинжилгээнд хамруулсан, тодорхой цагийн хуваариар ариутгал халдваргүйтгэл
хийнэ гэдгийг аймгийн ХХААГ-ын дарга Т.Ганболд мэдээлэв.
“Төвийн
бүсийн түншлэл-2021” үзэсгэлэн худалдаанд Дархан-Уул аймгийн худалдаа
эрхлэгчдээс гадна Сэлэнгэ, Булган аймаг, Улаанбаатар хотын жижиг, дунд бизнес
эрхлэгчид оролцож байна.
Гурван
өдөр үргэлжлэх үзэсгэлэн худалдаагаар аймгийн брэнд бүтээгдэхүүнийг уламжлал
ёсоор шалгаруулах аж. Түүнчлэн төрийн зарим байгууллагууд иргэдэд үйлчилгээ
үзүүлж байна. Тодруулбал ХХҮГ-аас аймгийн хэмжээнд үйл ажиллагаа явуулж буй ААНБ-ын
ажлын байрны захиалгыг авч иргэдэд зуучилж байна. Өнөөдрийн байдлаар 18
байгууллагын 118 ажлын байранд иргэд бүртгүүлж зуучилсан аж. Мөн нийгмийн халамжийн тэтгэвэр, тэтгэмж, хүүхдийн
мөнгөний асуудлаар иргэдэд зөвлөгөө мэдээлэл өгч байна.
Дэлхийн
стандартын өдрийг тохиолдуулан аймгийн Стандарт хэмжил зүйн хэлтсээс үзэсгэлэн
худалдаанд оролцож буй бүх ААНБ, иргэдийн хэмжүүрийг үнэ төлбөргүй
баталгаажуулж байна.
Энэ өдөр
үйлдвэр, хөдөө аж ахуй, ахуйн үйлчилгээний салбарт ажиллаж байсан, одоо ажиллаж
буй иргэдийг салбарын болон аймаг орон нутгийн шагналаар шагнан урамшууллаа.
