Улаанбаатар
Завханд 3600 орчим эх "Цалинтай ээж"-ийн тэтгэмж авч байна
ОРОН НУТГИЙН МЭДЭЭ | ЗАВХАН
Завхан /МОНЦАМЭ/. Завхан аймгийн хэмжээнд
өнөөдрийн байдлаар 3497 эх "Цалинтай ээж" хөтөлбөрт хамрагдаж байна. Харин өрх
толгойлсон 155 эх, эцэгт улирал бүр 240 мянган төгрөгийн тэтгэмжийг тус тус
олгож байгаа аж.
“Эх, олон хүүхэдтэй өрх толгойлсон эх, эцэгт
тэтгэмж олгох тухай хууль” хэрэгжсэнээр цалинтай ээж хөтөлбөрийн хүрээнд Завханд
0-3 настай хүүхэдтэй эхэд хүүхдээ асарч буй хугацаанд нь сар бүр 50000
төгрөгийг олгож буй юм. 
Харин 22 мянга гаруй хүүхэд хүүхдийн мөнгөн тэтгэмжид
хамрагдаж байгаа нь аймгийн хэмжээнд Өрхийн мэдээллийн нэгдсэн санд бүртгэгдсэн 18 хүртэлх насны нийт хүүхдийн 96,7 хувийг эзэлж байна.
Хөдөлмөр, нийгмийн хамгааллын
сайдын 2018 оны А/15 дугаар тушаалаар Өрхийн мэдээллийн санд бүртгэгдсэн 18 хүртэлх насны хүүхдэд бэлэн мөнгө хэлбэрээр олгох хүүхдийн мөнгөн
тэтгэмж олгох өрхийн босго шугамыг амьжиргааны түвшний үнэлгээний 554 болон
түүнээс доош оноогоор тогтоожээ.
Энэхүү үнэлгээгээр өнгөрсөн жил Завхан аймгийн
19112 хүүхдэд нэгээс гурван сарын хугацаанд хүүхдийн мөнгөн тэтгэмж олгосон
байна.
Мөн оны дөрөвдүгээр сараас эхлэн Хөдөлмөр, нийгмийн
хамгааллын сайдын 2018 оны А/137 дугаар тушаалаар хүүхдийн мөнгөн тэтгэмж олгох
өрхийн босго шугамыг амьжиргааны түвшний үнэлгээний 670 болон түүнээс доош
оноогоор шинэчлэн тогтоосноор 22169 хүүхэд хүүхдийн мөнгөн тэтгэмжид хамрагдсан
байна. Харин өнөөдрийн байдлаар 0-18 насны бүх хүүхэд мөнгөн тэтгэмжийг авч
байна хэмээн аймгийн ХХҮГ-аас мэдээлэв.
