“Apple” нүүрний хаалт үйлдвэрлэнэ

Дэлхийд | Эдийн Засаг
khulan@montsame.gov.mn
2020-04-06 12:33:27

ВАШИНГТОН. /Business Insider/. "Манай компани эмнэлгийн ажилтнуудад зориулан нүүрний хаалт үйлдвэрлэхээр боллоо" гэж АНУ-ын технологийн “Apple” компанийн гүйцэтгэх захирал Тим Кук ням гарагт “Twitter” хуудсаараа дамжуулан мэдэгджээ.


Apple” компани долоо хоногт нэг сая гаруй нүүрний хаалт үйлдвэрлэхээр төлөвлөж байгаа бөгөөд эдгээр бүтээгдэхүүнээ эхний ээлжинд АНУ-ын эмнэлгийн ажилтнуудад, дараа нь дэлхий даяар тараахаар төлөвлөсөн байна. Мөн тус компани халдвар тархахаас урьдчилан сэргийлэх үүднээс 20 сая амны хаалтыг дэлхий даяар хандивлаж байгаа ажээ.


Эмнэлгүүдэд нэн шаардлагатай тоног төхөөрөмж, эмнэлгийн хэрэгслийг үйлдвэрлэхэд цахилгаан бараа үйлдвэрлэгчдээс өгсүүлээд автомашин үйлдвэрлэдэг компаниуд хувь нэмрээ оруулсаар байгаа юм. 


Apple” компани нүүрний хаалт бүтээх, үйлдвэрлэх, нийлүүлэх үйл ажиллагаанд загвар зохион бүтээгчид, инженерүүд, нийлүүлэгчдээ татан оролцуулж эхэлжээ. Т.Кукийн мэдээлснээр, эхний ээлжийн нүүрний хаалтыг Цахиурын хөндийн зарим эмнэлэгт өнгөрсөн долоо хоногт хүргэсэн байна. Тус компани энэ төрлийн бүтээгдэхүүний үйлдвэрлэлд шаардлагатай материалыг АНУ, БНХАУ-аас авч байгаа ажээ. 

Холбоотой мэдээ