Японы хангамжийн хөлөг ОУ-ын сансрын станцтай холбогджээ
ДЭЛХИЙН МЭДЭЭ | ШИНЖЛЭХ УХААНТОКИО. /Kyodo/. Японы “Mitsubishi” компанийн “Kounotori 8” хангамжийн хөлөг 400 километрийн өндөрт байрлах Олон улсын сансрын станцтай холбогдсон гэж тус улсын Сансар судлалын агентлагаас мэдээлжээ.
ОУ-ын сансрын станц дээрх нисгэгчид хангамжийн хөлгийг робот гараар барьж авсны дараа ОУ-ын сансрын станцтай холбожээ. Хангамжийн хөлгийг тээсэн “H-2B” пуужинг өнгөрсөн лхагва гарагт Япон улсын баруун өмнөд нутгийн Танэгашима арлын пуужин хөөргөх талбайгаас хөөргөсөн байна.
5.3 тонн жинтэй хангамжийн хөлгөөр ОУ-ын сансрын станцын нисгэгчдэд хоол хүнс, цэвэр ус болон туршилт хийхэд шаардлагатай тоног төхөөрөмж, цэнэг хураагуурыг хүргэсэн гэж Сансар судлалын агентлагийн мэдээлэлд дурджээ.