Говь-Алтайн нутгаар хур тунадас орж хүйтэрнэ
ОРОН НУТГИЙН МЭДЭЭ | ГОВЬ-АЛТАЙГовь-Алтай /МОНЦАМЭ/ Ойрын өдрүүдэд Говь-Алтай аймгийн нутгаар хур тунадас орж хүйтэрнэ.
Аравдугаар сарын 1-нд тус аймгийн ихэнх нутгаар, 2-нд зарим газраар хур тунадас орж, эрс хүйтрэн, хүчтэй салхи шуургатай, бусад хугацаанд сэрүүн байна гэж аймгийн Ус цаг уур, орчны шинжилгээний төвөөс мэдээлэв.
Салхи 1-нд ихэнх нутгаар, 2,3-нд говь талын нутгаар түр зуур секундэд 18-20 м/с, зарим үед секундэд 24 метр хүрч ширүүсч шороон шуурга шуурах тул ард иргэдийг анхаарал болгоомжтой байхыг анхаарууллаа.
Агаарын температур 1-нд нутгийн баруун хэсгээр, 2-нд ихэнх нутгаар хүйтэрч Алтайн уулархаг нутгаар шөнөдөө 8-13 градус хүйтэн, өдөртөө 0-5 градус дулаан, нутгийн өмнөд хэсгээр шөнөдөө 1-4 градус хүйтэн, өдөртөө 11-16 градус, бусад нутгаар шөнөдөө 4-9 градус хүйтэн, өдөртөө 4-9 градус дулаан байх төлөвтэй байна. Харин аравдугаар сарын 6-ны өдрөөс тус аймгийн баруун хэсгээр, цаашдаа ихэнх нутгаар бага зэрэг дулаарах төлөвтэй аж.