Улаанбаатар
Олимпийн эрхийн төлөө хүч үзэх бөхчүүд тодорлоо
МОНГОЛЫН МЭДЭЭ | СПОРТ
Бразил улсад болох зуны олимпийн “Рио-де-Жанейро-2016” наадмын сонгомол барилдаан, эрэгтэй, эмэгтэй чөлөөт бөхийн Ази тивийн сонгон шалгаруулах тэмцээн Казахстан улсын Астана хотын “Даулет” спортын цогцолборт гуравдугаар сарын 18-20-нд болно.
Энэ тэмцээнээс жин бүрт эхний 2 байрт шалгарсан бөхчүүдэд өөрөөр хэлбэл 36 бөхөд олимпийн наадамд оролцох эрх олгоно. Өнгөрсөн жил АНУ-ын Лас-Вегас хотод болсон ДАШТ-нээс эрэгтэй 4, эмэгтэй 2 жинд нийт 6 олимпийн эрх авсан манай бөхчүүд тивийн тэмцээнээс үлдсэн 6 эрх олж авахаар зорьж байна. Казахстаны бөхийн холбооноос мэдээлж байгаагаар, тус улсад болох сонгон шалгаруулах тэмцээнд бөхчүүдээ оролцуулахаар 26 орон мэдүүлгээ өгөөд байна.
Манай улсаас эрэгтэйчүүдийн 86 кг-д О.Үйтүмэн /”Алдар” спорт хороо, үндэсний шигшээ багийн тамирчин, армийн дэлхийн аварга, Азийн аварга шалгаруулах тэмцээний мөнгө, хүрэл медальт, 2012 оны Зуны олимпийн наадамд оролцогч/, 96 кг-д ОУХМ Д.Хүдэрбулга /”Ганьт” клуб, үндэсний шигшээ багийн тамирчин, Ази тивийн аварга шалгаруулах тэмцээний алт, мөнгө, хошой хүрэл медальт/, Дасгалжуулагчаар Б.Баяраа /эрэгтэй үндэсний шигшээ багийн дасгалжуулагч, гавьяат дасгалжуулагч ажиллана.
Эмэгтэйчүүдээс 48 кг-д ОУХМ Э.Нарангэрэл /“Хангарьд” клуб, үндэсний шигшээ багийн тамирчин, Азийн аварга шалгаруулах тэмцээний мөнгөн медальт, тивийн залуучуудын аварга/, 53 кг-д ОУХМ Э. Сумьяа /“Хилчин” спорт хороо, үндэсний шигшээ багийн тамирчин, ДАШТ-ний болон Оюутны универсиад наадмын мөнгөн медальт/, 58 кг-д ОУХМ П.Орхон, /”Алдар” спорт хороо, залуучуудын ДАШТ-ний хүрэл, Армийн ДАШТ-ний болон Ази тивийн аврага шалгаруулах тэмцээний мөнгөн медальт/, 75 кг-д ОУХМ Б.Одончимэг /“Алдар” спорт хороо, ДАШТ-ний хүрэл медальт, оюутны ДАШТ-ний мөнгө, Азийн наадмын хүрэл, Ази тивийн аварга тэмцээний тус бүр 3 мөнгө, хүрэл медальт/ нар хүч үзэх бол дасгалжуулагчаар Б.Батбаяр /эмэгтэй үндэсний шигшээ багийн ахлах дасгалжуулагч, гавьяат дасгалжуулагч/, З.Дүвчин /эмэгтэй үндэсний шигшээ багийн дасгалжуулагч, гавьяат дасгалжуулагч/ нар ажиллана.
Багийн эмчээр Ч.Насанбат /БТСХТ-ийн Спортын анагаах ухааны албаны дарга, гавьяат эмч/ ажиллах бол тус тэмцээнд шүүгчээр олон улсын шүүгч Ц.Сэрээтэр ажиллахаар болжээ.
Д.Өлзий
