Улаанбаатар
Азийн паралимпийн хорооны ерөнхийлөгч М.Рашидтай УИХ-ын гишүүн Ё.Баатарбилэг уулзлаа
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Бүгд Найрамдах Индонез Улсын Жакарта хотноо болж буй Азийн Паралимпийн наадмын нээлтийн үеэр УИХ-ын гишүүн, НББСШУБХ-ны дарга Ё.Баатарбилэг тэргүүтэй төлөөлөгчид Азийн Паралимпийн хорооны ерөнхийлөгч Мажид Рашидтай уулзав.
Уулзалтаар Монголын Азийн паралимпийн тамирчдыг дэмжих, Монголд паралимпийн төрлүүдийг хөгжүүлэх, 2020 онд болох Токиогийн олимпод Монголын тамирчдын оролцох бололцоог нэмэгдүүлэх талаар Байнгын хорооны даргын тавьсан хүсэлтүүдийг Мажид Рашид нааштайгаар хүлээн авч буйгаа илэрхийлсэн юм.
Мөн 2019 онд олимпийн эрх авах тэмцээнүүдэд Монголын паралимпийн тамирчид, дасгалжуулагч, шүүгчдийг сургах, дадлагажуулах, техник тоног төхөөрөмжөөр дэмжлэг үзүүлэх, Монгол Улсад шинээр хөгжиж байгаа паралимпийн төрлүүдийг хөгжүүлэхэд тусламж үзүүлэх асуудлаар санал солилцлоо.
Уулзалтад УИХ-ын гишүүн Д.Ганболд, Монголын паралимпийн холбооны удирдлагууд оролцов. УИХ-ын гишүүн Ё.Баатарбилэг тэргүүтэй төлөөлөгчид Бүгд Найрамдах Солонгос Улсын Соёл, спорт, аялал жуулчлалын дэд сайд Ро Тэкан, тус улсын паралимпийн хорооны ерөнхийлөгч Ли Мён Хо, Япон Улсын паралимпийн хорооны дэд ерөнхийлөгч Масаюки Мизуно, Азийн паралимпийн наадмыг зохион байгуулах хорооны дарга Ража Сапта, Октохари нартай уулзсан байна.УИХ-ын гишүүд Азийн паралимпийн наадамд оролцож байгаа тамирчидтай уулзлаа. Бүгд Найрамдах Индонез Улсын Жакарта хотноо зохион байгуулагдаж байгаа Азийн паралимпийн наадамд оролцож байгаа Монголын баг тамирчидтай УИХ-ын гишүүн, НББСШУБХ-ны дарга Ё.Баатарбилэг, УИХ-ын гишүүн Д.Ганболд нар уулзаж ярилцлаа.
Энэ удаагийн наадамд
Монголын баг 40 гаруй тамирчин, 20 гаруй дасгалжуулагч, багш, эмч, менежерүүдийн
хамт оролцож байгаа бөгөөд манай баг мөнгө, хүрэл медаль тус бүр нэгийг хүртээд байна.
УИХ-ын гишүүд Азийн
паралимпийн тоглолтын нээлтэд улсаа төлөөлөн оролцож, эмэгтэй суугаа волейбол,
сурын харвааны тэмцээнүүдийг үзэж, тамирчдын хотхонд зочилж, баг тамирчдынхаа
санал хүсэлтийг сонсож ярилцлаа.
