Ulaanbaatar
СҮХБААТАР: Соёл амралтын хүрээлэнгийн гүйцэтгэл 93 хувьтай үргэлжилж байна
ОРОН НУТГИЙН МЭДЭЭ | СҮХБААТАР
Баруун-Урт, 2025 оны наймдугаар сарын 29 /МОНЦАМЭ/. Улсын хэмжээнд томоохонд тооцогдох соёл амралтын хүрээлэнг Сүхбаатар аймагт бүтээн байгуулж байна. Баруун-Урт сумын Уртын гол дагуу нийт 40 мянган га талбайд төлөвлөлт хийснээр гурван жилийн өмнө эхлүүлсэн дээрх төслийн гүйцэтгэл
93 хувьтай үргэлжилж байна.
Нийт талбайн 2.9 га-д гадна талбай, 0.5 га-д явган зам, 8 1.7 га-д дугуйн болон гүйлтийн зам, 20.7 га-д ногоон байгууламж, 1 га-д 315 авто машины зогсоол, автобус унадаг дугуйн зогсоолтойгоор төлөвлөжээ. Харин 0.19 га талбайд 450 хүний суудалтай задгай театр байгуулж байна. Мөн 0.48 га талбайд түргэн үйлчилгээний 22 цэг, таван цэгт нийтийн бие засах газар, гурван байрлалд харуулын байртай, дугуйн болон гүйлтийн замыг холбосон хоёр, төв зам дагуух явган замыг мини парктай холбосон нэг гүүртэйгээр зохион байгуулалт хийжээ. Угтах болон төв талбайн хажууд хоёр усан оргилуур төлөвлөсөн бол 0.4 га талбайтай 0.3 метр гүн хиймэл нуурыг хийж байгаа юм.
Ийнхүү иргэд, олон нийтийн анхдагч
хэрэгцээг хангасан, чөлөөт цагаа тав тухтай өнгөрүүлэх нөхцлийг бүрдүүлсэн нэгэн цогц томоохон хүрээлэнг тун удахгүй ашиглалтад хүлээлгэж өгөхөөр болжээ.
Улсын төсвийн 15 орчим тэрбум төгрөгийн хөрөнгө оруулалтаар хэрэгжиж буй тус төслийн гүйцэтгэгчээр “Монгол зам групп”, “Их модун” ХХК ажиллаж байна.
