Улаанбаатар
Оросын ШУА-ийн Алс Дорнодын салбарын “Хүндэт доктор” цолыг Д.Рэгдэлд олгов
МОНГОЛЫН МЭДЭЭ | БОЛОВСРОЛ
Улаанбаатар /МОНЦАМЭ/. Оросын ШУА-ийн Алс Дорнодын салбарын дарга, Оросын ШУА-ийн
дэд ерөнхийлөгч, академич В.И.Сергиенко
тэргүүтэй төлөөлөгчид Монголд
айлчилж байна.
Эдгээр төлөөлөгч ШУА-д зочилж хоёр орны шинжлэх ухааны
салбарын хамтын ажиллагааны талаар ярилцаж, ШУА-ийн зарим хүрээлэнгүүдийн үйл
ажиллагаатай танилцлаа.
Оросын ШУА-ийн Алс Дорнодын салбар нь ШУА-ийн харьяа
хүрээлэнгүүд тэр дундаа нийгэм, хүмүүнлэгийн салбарт түлхүү хамтын ажиллагаатай
явж иржээ. Цаашдаа хүрээгээ тэлж байгалийн ухааны салбарт ч хамтран ажиллах
бүрэн боломжтой гэдгийг талууд ярилцаж ойрын үед судалгааны чиглэлээ
илүү тодорхой болгохоор тохиролцлоо.
Академич В. И. Сергиенко тэргүүтэй төлөөлөгчид Монголд айлчлах үеэрээ ШУА-ийн
ерөнхийлөгч Д.Рэгдэлд Оросын ШУА-ийн Алс Дорнодын салбарын “Хүндэт
доктор” цолыг олгохоор иржээ.
Энэхүү цол гардуулах ёслолын үеэр академич В. И. Сергиенко
ШУА-ийн ерөнхийлөгч Д.Рэгдэлийг Оросын ШУА-ийн гадаад гишүүнээр сонгогдсонд
баяр хүргэж мэндчилгээ дэвшүүлж, улмаар Оросын ШУА-ийн Алс, Дорнодын салбарын
“Хүндэт доктор” цол олгож, мөн Оросын ШУА-ийн Алс Дорнодын салбарын
академич В.А.Комаровагийн нэрэмжит “Хүндэт медаль”-иар шагнав.
Энэхүү шагналыг хоёр улсын шинжлэх ухааны хамтын
ажиллагаанд үнэтэй хувь нэмэр оруулсныг үнэлж олгож байгаа юм.
ШУА-ийн ерөнхийлөгч Д.Рэгдэл, дэлхийн нэр хүндтэй эрдэмтдэд олгодог дээрх шагналыг хүртэж байгаадаа талархал илэрхийлээд “Хоёр орны хамтарсан эрдэм шинжилгээний ажилд оюутан цагаасаа эхэлж өнөөгийн ШУА-ийн ерөнхийлөгч хүртэлх бүхий л цаг хугацаанд хамтран ажиллаж, оролцож иржээ. ШУА-ийн ерөнхийлөгчийн хувьд хоёр орны шинжлэх ухаан, технологи, инновацын салбарын хамтын ажиллагааг бүх талаар дэмжиж ирсэн, ирээдүйд ч дэмжих болно. Оросын ШУА-ийн Алс Дорнодын салбартай ШУА олон жилийн хамтын ажиллагааны түүхтэй. Энэхүү хамтын ажиллагаандаа бид их ач холбогдол өгдөг” хэмээн онцолсон юм.
