Улаанбаатар
БНАСАУ зенитийн шинэ пуужин туршсанаа мэдэгджээ
ДЭЛХИЙН МЭДЭЭ | УЛС ТӨР
МОСКВА. /TASS/. БНАСАУ шинэ төрлийн зенитийн шинэ пуужин туршсан тухай тус улсын төв радио станц болох "Солонгосын дуу хоолой" өнөөдөр мэдээлэв.
Саяхан бүтээсэн зенитийн пуужингийн туршилтыг есдүгээр сарын 30-ны пүрэв гарагт явуулжээ. Туршилтын зорилго нь "пуужин харвагч аппарат, радио локатор болон БНАСАУ-ын Цэргийн шинжлэх ухааны академийн бүтээсэн энэхүү пуужингийн техникийн үзүүлэлтүүдийг шалгах байв" гэж "Солонгосын дуу хоолой" радио мэдээлжээ.
Пуужин харвах туршилтад намын хорооны нарийн бичгийн дарга Пак Жон Чун, батлан хамгаалахын шинжлэх ухаан судлалын хэлтсийн албан тушаалтнуудтай хамт оролцсон байна. Уг пуужин нь "газар-агаар" ангиллынх байж магадгүй гэж шинжээчид таамаглаж байна.
Туршилтын явцад шинэ технологи нэвтрүүлснээр пуужингийн чиглүүлэлтийн нарийвчлал, тусгалын хүрээ нэмэгдсэн болох нь батлагдсан гэж БНАСАУ-ын Цэргийн шинжлэх ухааны академи онцолжээ.
Пёньян энэ долоо хоногийн эхээр буюу есдүгээр сарын 28-ны мягмар гарагт дуунаас хурдан пуужин болох "Хвасон-8"-ийг анх удаа туршсан юм. Түүнчлэн энэ долоо хоногт Япон тэнгис рүү алсын тусгалтай пуужин харвасан тухай БНСУ-ын Зэвсэгт хүчний штабуудын дарга нарын хорооноос мэдээлсэн билээ.
