Улаанбаатар
Дундговийн баруун болон хойд нутгаар бороо ахиу оржээ
ОРОН НУТГИЙН МЭДЭЭ | ДУНДГОВЬОйрын өдрүүдэд Дундговийн нутгаар үүлэрхэг байна. Өнгөрсөн долоо хоногийн сүүлээр орсон бороо энэ долоо хоногт ч үргэлжлэхээр байгааг аймгийн УЦУОШ-ний газраас мэдээллээ.
Өнгөрсөн долоо хоногт орсон бороо аймгийн нийт нутгийг хамарсан бөгөөд хамгийн ихдээ баруун талын Эрдэнэдалай, Луус, Хулд, Дэлгэрхангай, хойд талын Адаацаг, Дэлгэрцогт, зүүн талын Цагаандэлгэр, Говь-Угтаал, Дэрэн сумын нутгаар 10- 46 мм хур тунадас орсон байна.
Харин Сайхан-Овоо, Гурвансайхан, Өлзийт, Өндөршил сум болон Мандалговь хотод арай бага буюу 5.2- 9.0 мм хур тунадастай байжээ.
УЦУОШ-ний газрын “Мандал бороо” экспедиц энэ үеэр Хулд, Өлзийт, Гурвансайхан, Өндөршил сумын нутагт хур тунадасны хэмжээг нэмэгдүүлэхээр үүлэнд зориудаар нөлөөлсөн байна.
Цаг агаарын урьдчилсан төлвөөр энэ сарын 9-10-нд зарим нутгаар, 11-нд нийт нутгийг хамарсан бороотой. Энэ үеэр ч мөн “Мандал бороо” экспидиц үүлэнд зориудаар нөлөөлөх ажээ.
Т. Отгонтуяа
