УДБЭТ-ын цахим хуудсаар "Жизель" балет үзэгчдэд хүрнэ

Монголын мэдээ | Соёл урлаг
sodonizm@gmail.com
2020-11-18 16:34:22

Улаанбаатар /МОНЦАМЭ/. А.Аданы "Жизель" балетыг УДБЭТ-ын цахим хуудсаар өнөөдөр 17:00 цагаас үзэгчдэд хүрнэ.

Нийслэлийн соёл урлагийн газраас хэрэгжүүлж буй "Цахим соёлоор дархлаагаа дэмжье" уриан дор дээрх тоглолтыг ийнхүү үзүүлэх гэж буй юм.

Бүх цаг үеийн хамгийн гунигт хайрын түүхийг өгүүлсэн “Жизель” балетыг анх 1841 онд Францын Эзэн хааны хөгжмийн академийн театрт тоглож байжээ. Ордны баяр дээр шөнөжин бүжиглэсэн залуу охин хүйтэн үүрээр нас нөгчсөн гунигт түүхийг өгүүлдэг Виктор Хюгогийн “Фантомууд” хэмээх найраглалыг уншсан Францын урлаг судлаач, шүүмжлэгч Теофиль Гаутьен сэтгэл ихэд хөдөлж, уг бүтээлээс хэсэглэн авч “Жизель” балетын цомнолыг бичсэн түүхтэй.

Өнөөг хүртэл тус балетыг дэлхийн олон оронд өөр өөр балетмейстерүүдийн тавилтаар тоглодог, гайхамшигт сонгодог бүтээл юм.

Уг бүтээлд хайртай залуу нь өөр бүсгүйтэй сүй тавьсныг мэдээд зүрх нь хаагдаж нас бардаг охины тухай өгүүлнэ. Залуусыг үхтэл нь бүжиглүүлдэг сүнс бүсгүйчүүд Жизелийн сэтгэлт хархүүд ч бас ижил хувь тавилан тохионо. Гэвч Жизелийн агуу их хайр залууг тэр гунигт тавилангаас чөлөөлнө.

 


Холбоотой мэдээ