Улаанбаатар
Ирэх онд Монгол Улс, ОХУ хооронд дипломат харилцаа тогтоосны 100 жилийн ой тохионо
МОНГОЛЫН МЭДЭЭ | ГХЯ-НЫ МЭДЭЭ
Улаанбаатар /МОНЦАМЭ/. Гадаад харилцааны дэд сайд Б.Мөнхжин ОХУ-аас Монгол Улсад суугаа Онц бөгөөд Бүрэн эрхт Элчин сайд И.К.Азизовыг өнөөдөр хүлээн авч уулзлаа.
Талууд Монгол, Оросын харилцааны зарим асуудлаар санал солилцож, энэ оны хоёрдугаар хагаст хамтран хэрэгжүүлэх арга хэмжээнүүд болон ирэх онд тохиох Монгол Улс, ОХУ хооронд дипломат харилцаа тогтоосны 100 жилийн ойг тэмдэглэн өнгөрүүлэх асуудлыг хэлэлцэв.
Гадаад харилцааны дэд сайд Б.Мөнхжин иж бүрэн стратегийн түншлэлийн харилцааг хөгжүүлэх хүрээнд хоёр талын хэрэгжүүлж буй төсөл, арга хэмжээнүүдэд дэмжлэг үзүүлэн ажиллахаа илэрхийлээд цар тахлын улмаас түр зогсонги байдалд орсон ажлуудыг идэвхжүүлэх нь чухал байгааг мөн цохон тэмдэглэлээ.
Элчин сайд И.К.Азизов Монгол, Оросын уламжлалт найрсаг харилцааг бэхжүүлэх чиглэлээр цаашид ч ГХЯ-ны удирдлагатай нягт хамтран ажиллахад бэлэн буйгаа дахин нотолж, хоёр талын харилцааны зарим асуудлаар санал бодлоо илэрхийлэв.
