Эрчим хүчний сайд асан М.Сономпилд дөрвөн жилийн хорих ял оноов
МОНГОЛЫН МЭДЭЭ | ХУУЛЬУлаанбаатар /МОНЦАМЭ/. Нийслэлийн прокурорын газраас яллах дүгнэлт үйлдэж хүргүүлсэн Эрчим хүчний сайд асан М.Сономпилд холбогдох хэргийг Хан-Уул дүүргийн Эрүүгийн хэргийн анхан шатны шүүх өчигдөр хэлэлцэж, түүнд дөрвөн жилийн хорих ял оноов.
Тодруулбал, М.Сономпил нь Эрчим хүчний сайдаар ажиллаж байх хугацаандаа Дарханы ДЦС-д хаягдал үнсэн сав шинээр барих ажлын гүйцэтгэгчээр “Хотгор зам” ХХК-ийг сонгон шалгаруулсныхаа хариуд иргэн Х-гээс 266 сая төгрөгийн хахууль авсан нь нотлогдож байна гэж шүүх үзжээ.
Тиймээс шүүхийн шийдвэрээр, Эрүүгийн хуулийн тусгай ангийн 22.4 дүгээр зүйлийн 4 дэх хэсэгт зааснаар, М.Сономпилд дөрвөн жилийн хорих ялыг нээлттэй ангид биечлэн эдлүүлэх, хууль бусаар олж авсан 266 сая төгрөгийг улсын орлого болгохоор шийдвэрлэсэн байна.