Улаанбаатар
Эрчим хүчний сайд Лондон хотод айлчлав
МОНГОЛЫН МЭДЭЭ | ГХЯ-НЫ МЭДЭЭ
Улаанбаатар /МОНЦАМЭ/. Эрчим хүчний сайд Ц.Даваасүрэн тэргүүтэй төлөөлөгчид энэ сарын 25-нд Лондон хотноо ажлын айлчлал хийв.
Айлчлалын хүрээнд, сайд Ц.Даваасүрэн Британийн Гадаад хэрэг, хамтын нөхөрлөлийн яамны Ази, Номхон далайн асуудал хариуцсан Төрийн сайд Марк Филд, Британийн Ерөнхий сайдын Монгол Улстай харилцах Худалдааны элч Жулиан Найт, Британи-Монголын парламентын бүлгийн дарга Жон Грогэн, Европын сэргээн босголт, хөгжлийн банкны дэд ерөнхийлөгч Алэйн Пилью болон Британийн эрчим хүчний салбарын мэргэжлийн холбоод, эрчим хүчний компаниудын төлөөлөлтэй тус тус уулзаж хоёр орны эрчим хүчний салбарын хамтын ажиллагаа, ухаалаг эрчим хүчний системийн талаар санал солилцов.
Сайд Ц.Даваасүрэн Монгол Улсын Эрчим хүчний яамнаас 2019 оныг “Ухаалаг эрчим хүч”-ний жил болгон зарласантай холбоотойгоор эрчим хүчний салбарын бүх шатанд ухаалаг систем хэрэглэхийг зорьж байгааг тэмдэглээд, цаашдаа хоёр орны эрчим хүчний салбарын хамтын ажиллагааг эрчим хүчний үр ашгийг нэмэгдүүлэх, ухаалаг систем, инноваци нэвтрүүлэх төслийн хүрээнд чиглүүлэх саналтай байгаагаа уулзалтын үеэр илэрхийлж байв.
