Улаанбаатар
Япон улс Монголын хүний нөөцийг хөгжүүлэхэд хувь нэмрээ оруулна
МОНГОЛЫН МЭДЭЭ | ГХЯ-НЫ МЭДЭЭ
Улаанбаатар /МОНЦАМЭ/. Гадаад харилцааны сайд Д.Цогтбаатар Япон Улсаас Монгол Улсад суугаа Онц бөгөөд Бүрэн эрхт Элчин сайд М.Такаокаг энэ өдөр хүлээн авч уулзлаа.
Уулзалтын үеэр талууд Монгол, Японы Стратегийн түншлэлийн харилцаа улам бэхжиж, улс төрийн итгэлцэл гүнзгийрч буйг тэмдэглэж, 2019 онд хоёр талаас хэрэгжүүлэх дээд, өндөр түвшний айлчлал зэрэг харилцаа, хамтын ажиллагааны голлох арга хэмжээ, бүс нутгийн харилцан сонирхсон асуудлаар ярилцав.
Түүнчлэн Япон Улсын Парламентаас “Гадаадын иргэн, харъяатын багц хууль”-ийг 2018 онд шинэчлэн баталж, гадаадын 9 улс, түүний дотор Монгол Улсаас Японд ур чадвартай ажилтан хүлээн авахаар тогтоод буй нь Монгол Улсын хүний нөөцийг хөгжүүлэхэд зохих хувь нэмэр оруулна гэдэгт найдаж байгаагаа илэрхийлэв.
Элчин сайд М.Такаока Монгол Улсын Ерөнхий сайд У.Хүрэлсүхийн 2018 онд Япон Улсад хийсэн айлчлалын ач холбогдлыг тэмдэглэж, талууд Монгол, Японы Стратегийн түншлэлийг бүхий л салбарт гүнзгийрүүлэн хөгжүүлэхэд үргэлжлүүлэн нягт хамтран ажиллахаа нотлов.
