Улаанбаатар
“Миний ажил-миний бахархал” үзэсгэлэнг тольдоорой
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/. Цагдаа, дотоодын цэргийн алба хаагчдын “Миний ажил-миний бахархал” үзэсгэлэн өнөөдөр /2018.12.19/ “Блю Мон” центрийн “Norphei Art gallery”-д нээлтээ хийв.
ЦЕГ-ын Хэвлэл мэдээллийн төвөөс алба хаагчдын дунд зохион байгуулсан “Миний ажил-миний бахархал” гэрэл зургийн уралдааны эцсийн шалгаруулалтад тэнцсэн бүтээлүүдийг дэлгэн үзүүлж буй тус үзэсгэлэнгээр Алба хаагчдын эерэг хандлагыг нэмэгдүүлэх, ажлаараа бахархах сэтгэгдлийг төрүүлэх, тэдний сонирхлыг хөгжүүлэх, байгууллагын үйл ажиллагаа, албаны техник, тусгай хэрэгслийг олон нийтэд сурталчлан таниулах зорилгоор зохион байгуулсан энэхүү уралдаанд 38 анги, байгууллагаас 200 гаруй бүтээл иржээ. Үүнээс мэргэжлийн гэрэл зурагчдын тодруулсан 80 бүтээлийг дэлгэн үзүүлж байгаа нь энэ аж.
Гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах үүргээ нэр төртэйгөөр биелүүлж, төр, ард түмнийхээ өмнө өргөсөн тангарагтаа үнэнчээр зүтгэж буй алба хаагчдын агшныг ийнхүү гэрэл зургийн хальснаа буулгажээ.
Энэхүү үзэсгэлэнгээс уралдаанд оролцогчдын шилдэг бүтээлээс гадна 2018 онд цагдаа, дотоодын цэргийн байгууллагад өрнөсөн онцлог үйл явдлууд мэргэжлийн гэрэл зурагчдын дуран авианд хэрхэн буусныг тольдож болох юм.
“Миний ажил-миний бахархал” үзэсгэлэн хоёр өдрийн турш үзэгчдийн хүртээл болно.
