Ulaanbaatar
Өргөсөөр бүрхэгдсэн “хачин жигтэй” үлэг гүрвэл байсныг илрүүлжээ
ДЭЛХИЙН МЭДЭЭ | ШИНЖЛЭХ УХААН
ЛОНДОН, 2025 оны наймдугаар сарын 29 /AFP/. Их биеэрээ дүүрэн урт ясан өргөстэй үлэг гүрвэлийг “хамгийн хачин жигтэй” үлэг гүрвэлүүдийн нэг гэж үзэж байгааг “Nature” шинжлэх ухааны сэтгүүлд нийтэлсэн өгүүлэлд дурджээ.
Одоогоос 165 сая
жилийн өмнө манай гараг дээр амьдарч байсан Спикомеллус нь танк шиг биетэй
гэдгээрээ алдартай өвсөн тэжээлт үлэг гүрвэлүүдийн бүлэг болох дэлхийн хамгийн
эртний анкилозавр ажээ.
Спикомеллусын зургийг 2019 онд Мароккогоос олдсон нэгэн хавирганы ясны хэлбэрээс үлгэрлэн палеотологичид гаргажээ. Харин шинээр олдсон үлдэгдлүүд нь судлаачдад ер бусын үлэг гүрвэлийн талаар илүү тодорхой дүр зургийг гаргахад тус дөхөм боллоо.
Тэдгээр чулуужсан
олдворыг судалж үзэхэд, уг амьтан нь бүх хавиргандаа холбогдсон ясан өргөснүүдтэй
байсныг харуулсан бөгөөд энэ нь урьд өмнө нь амьдарч байсан эсвэл устаж үгүй
болсон сээр нуруутан амьтдын аль ч төрөлд байгаагүй зүйл юм гэж лхагва гарагт
нийтлэгдсэн судалгаанд дурдсан байна.
Төслийн ахлагч,
Бирмингемийн их сургуулийн профессор Ричард Батлер чулуужсан олдворуудыг “гайхалтай
ач холбогдолтой нээлт” хэмээн тодорхойлжээ. “Спикомеллус бол бидний олж
илрүүлсэн хамгийн хачирхалтай үлэг гүрвэлүүдийн нэг” гэж тэрбээр хэлсэн байна.
Лондоны Байгалийн
түүхийн музейн профессор Сюзанна Мейдментийн хэлснээр, уг өргөст хуяг нь анх биеэ
хамгаалах зорилгоор үүссэн боловч хожим нь эрэгчин эмэгчнээ татах,
өрсөлдөгчдөө айлгах зорилгоор ашиглагддаг болсон байх магадлалтай ажээ.
“Спикомеллус нь биеийнхээ бүх хэсэгт тархсан олон янзын өргөстэй байсан, тухайлбал, хүзүүндээ нэг м урт өргөснүүдтэй, мөн ташаан дээгүүрээ дээшээ чиглэсэн асар том өргөснүүдтэй байсан. Бид урьд өмнө нь ийм зүйлийг ямар ч амьтанд харж байгаагүй” гэж тэрбээр тайлбарласан байна.
