Ulaanbaatar
Д.Батбаяр: Надад оффшор данс бий
МОНГОЛЫН МЭДЭЭ"Panama papers" буюу Панамын баримтууд олон нийтэд ил болсон. Уг баримтад Кёкүшюзан Д.Батбаярыг оффшор бүсэд данстай хэмээн мэдээлсэнтэй холбогдуулж энэ талаар тодрууллаа.
-Таныг оффшор данстай гэж зарласан. Энэ талаар тайлбар хийхгүй юу?
-Оффшор данс гэдгээ юуг хэлээд байгаа юм бол. Гадаад дахь дансыг хэлээд байх шиг байна. Надад оффшор данс байгаа юу гэвэл байгаа. Гэхдээ 25 жилийн өмнө тухайн үед Японд барилдаж байхдаа цалингаа авдаг байсан данс байгаа юм. Тэнд амьдарч байсан учраас 4, 5 данс нээлгэсэн байсан. Харамсалтай нь хаалгаагүй. Одоо бол мөнгө байхгүй. Харин гадуур яригдаад байгаа шиг оффшор данс байхгүй. Очиж үзээ ч үгүй. Татвараас зайлсхийсэн зүйл байхгүй.
-Гадаадын компаниудтай хамтардаг уу?
-Гадны ганц, хоёр компанитай хамтардаг. Монголдоо 20-иод компанитай хамтарч ажилладаг. Гэхдээ нэг их үйл ажиллагаа явуулдаггүй.
-Улстөрийн албан тушаалтай байхдаа дээрх дурдсан дансаа ашигладаг байсан уу?
-Улстөрийн албан тушаалтай байхдаа тэр дансыг ашиглаагүй. Зодог тайлаад л тэр дансыг мартсан. Карт нь ч хаана байгааг мэдэхгүй.
-Хөрөнгө орлогын мэдүүлэгт тухайн үедээ мэдүүлж байсан уу?
-Гадаадад мөнгөтэй юу гэж асууж байхад мөнгө байхгүй байсан юм чинь "Байхгүй" гэж мэдүүлсэн. Дансны хувьд цаанаасаа хаагаагүй бол байгаа л байх. Ямар нэгэн зорилгоор, бодлогоор ингэж байгааг мэдэхгүй байна
-УИХ-д нэр дэвших үү?
-УИХ-д нэр дэвших тухайгаа АН-д албан ёсоор мэдэгдсэн. Үндэсний зөвлөлдөх хороо шийдэх байх.
Б.Туул
