Ulaanbaatar
Бүртгүүлсэн иргэдийн арав хүрэхгүй хувь нь ажилд зуучлагджээ
ОРОН НУТГИЙН МЭДЭЭ | ДУНДГОВЬ2016 оны эхний гурван сарын байдлаар ажил идэвхитэй хайж аймгийн Хөдөлмөрийн хэлтэст бүртгүүлсэн 692 хүн байна. Бүртгүүлсэн иргэдээс 59 нь ажлын байранд зуучлуулжээ.
Ажилд орсон иргэдийн 37 хувь нь төрийн удирдлага ба батлан хамгаалах салбарт, 8.5 хувь нь үйлчилгээний бусад салбарт ажлын байртай болсон бол боловсруулах аж үйлдвэр, уул уурхайн олборлолт, боловсролын салбарт тус бүр 6.8 хувь нь ажлын байраар хангагдсан байна. Үлдсэн хувь нь нийгмийн халамжийн үйл ажиллагааны салбар, хүн хөлслөн ажиллуулдаг өрхийн үйл ажиллагаа, бөөний болон жижиглэнгийн худалдаа, урлаг, үзвэр үйлчилгээнд тус тус ажлын байртай болжээ.
Ажил идэвхтэй хайж Хөдөлмөрийн хэлтэст бүртгүүлсэн иргэдийн тоо өнгөрсөн оны энэ үеийнхээс 25- аар өссөн бөгөөд нийт ажилгүйчүүдийн 56.6 хувь нь эмэгтэйчүүд байна.
Аймгийн хэмжээнд хөдөлмөрийн насны 10000 хүнд 232 ажилгүйчүүд ногдож байхад Гурвансайхан, Баянжаргалан, Дэлгэрхангай, Өндөршил суманд 390- 456 байгаа нь аймгийн дунджаас дээгүүрт тооцогдож байна.
Т. Отгонтуяа
