Испани хэлний бэлтгэл хөтөлбөр эхлүүлэх чиглэлээр куба улстай хамтран ажиллах санал тавив

МОНГОЛЫН МЭДЭЭ | БОЛОВСРОЛ
bolor@montsame.mn
2022-07-06 21:17:33

Улаанбаатар /МОНЦАМЭ/. Боловсрол, шинжлэх ухааны сайд Л.Энх-Амгалан Бүгд Найрамдах Куба улсаас Монгол Улсад суугаа Элчин сайд Хорхе Альберто Феррер Родригесыг хүлээн авч уулзлаа.


Монгол Улс, Бүгд Найрамдах Куба Улсын Засгийн газрын гэрээгээр 1962 оноос хойш өнөөдрийг хүртэл нийт 150 иргэн суралцаж төгссөн. Одоо жил бүр 3 оюутныг сургадаг.

Засгийн газар хоорондын гэрээнээс гадна боловсролын зээлийн сангийн дэмжлэгтэй оюутан нэмж суралцуулах хүсэлтийг Боловсрол, шинжлэх ухааны сайд тавилаа. Мөн испани хэлтэй орнуудад оюутан сургах сонирхолтой байгаагаа илэрхийлж испани хэлний бэлтгэл хөтөлбөрийг хамтран хэрэгжүүлэх талаар санал солилцов. Хоёр орны дээд боловсролын дипломыг харилцан хүлээн зөвшөөрөх хэлэлцээрийн үр дүнг сайжруулах шаардлагатай байгааг уулзалтыг үеэр дурдсан юм.

Боловсролоос гадна шинжлэх ухааны салбарт хамтрах талаар ярилцлаа. Куба улс ковидын эсрэг 3 төрлийн вакцин гарган авч 2-оос дээш настай хүн амаа дархлаажуулжээ. Анагаахын салбараас гадна хөдөө аж ахуй, мал эмнэлэг, малын вакцин гаргаж авах чиглэлээр хамтын судалгааг эхлүүлэх боломжтой гэдэгт талууд санал нэгдлээ. Мөн үлийн цагаан оготно устгах, хачигны эсрэг вакцин гаргаж авах чиглэлээр хамтын ажиллагааны боломжууд нээлттэй байгааг Элчин сайд онцоллоо.



Холбоотой мэдээ