Улаанбаатар
Самарт яваад сураггүй болсон иргэдийг эрэн хайхад нисдэг тэрэг нисгэнэ
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Сэлэнгэ аймгийн Мандал сум дахь сум дундын Цагдаагийн хэлтэст иргэн А-ийн ирүүлсэн мэдээллийн дагуу орон нутгийн цагдаагийн байгууллага эрлийн ажиллагааг эхлээд байна.
Тодруулбал, Сэлэнгэ аймгийн Мандал сум дахь сум дундын Цагдаагийн хэлтэст энэ сарын 17-ны 17:00 цагт иргэн А “Миний дүү Д, түүний найз У нар тус аймгийн Ерөө сум руу самарт яваад сураггүй болчихлоо” гэж хандсан байна. Тус мэдээллийн дагуу орон нутгийн цагдаагийн байгууллага холбогдох арга хэмжээг авч, энэ сарын 19-нд Сэлэнгэ аймгийн Онцгой байдлын газарт эрэн хайх ажиллагааг хамтран явуулах албан бичиг ирүүлснээр хамтарсан бүлэг самранд яваад сураггүй болсон дөрвөн иргэнийг эрэн хайх ажиллагааг зохион байгуулж байна.
Улмаар энэ
сарын 21-нд ЦЕГ-аас Ерөө
сумын хэмжээнд ЗИЛ-131 автомашин болон мориор эрлийн ажиллагааг 300 км газарт
зохион байгуулсан боловч бороо хур их орсноос хүндрэл учирч, эрлийг
үргэлжлүүлэн явуулах боломжгүй байгаа тул эрлийн баг /агаарын/ гаргаж, хамтран
ажиллахыг хүссэн албан бичгийг Онцгой байдлын ерөнхий газарт ирүүлсэн.
Уг албан бичгийн дагуу Онцгой байдлын ерөнхий газраас
Зэвсэгт хүчний жанжин штабт хүсэлт хүргүүлснээр Зэвсэгт хүчний 303-р ангийн
нисдэг тэргийг хөөргөхөөр болж, эрлийн нэмэлт бүлгийг томилж бэлтгэл ажлыг
хангаж байна. Үндэсний аврах бригадын
эрэн хайх бүлгийг тус бригадын захирагч, хурандаа Д.Намсрай ахалж явна.
