Улаанбаатар
Иргэдийг үнэлгээний хороонд орж ажиллахыг хүсэв
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. НИТХ-ын Тэргүүлэгчдийн ээлжит хурал боллоо. Хурлаар гамшгаас урьдчилан сэргийлэх үйл ажиллагаанд төр, хувийн хэвшлийн болон салбар дундын хамтын ажиллагаа, иргэдийн оролцоог хангах, бодлогын зөвлөмж гаргах зорилгоор Гамшгийн эрсдэлийг бууруулах нийслэлийн зөвлөлийн бүрэлдэхүүн болон ажиллах журмыг батлав.
Мөн хурлаар нийслэлийн ХАА-н салбарт олон жил үр бүтээлтэй ажиллаж, амжилт гаргасан Сонгинохайрхан дүүргийн XXI хорооны иргэн Т.Шагдарсүрэн, Б.Болормаа, Хан-Уул дүүргийн XIII хорооны иргэн Ш.Эрдэнэцогт, Багануур дүүргийн II хорооны иргэн Л.Баянжаргал, IV хорооны иргэн П.Сундуй нарыг “Нийслэлийн тэргүүний фермер”-ээр, Сонгинохайрхан дүүргийн XXI хороонд үйл ажиллагаа явуулж буй “Баянбүрд ногоон төгөл” ХХК-ийг “Нийслэлийн тэргүүний тариаланч хамт олон”-оор тус тус шалгаруулав.
Түүнчлэн өнөөдрийн хурлаар Орон нутгийн хөгжлийн сангийн хөрөнгө оруулалтаар хэрэгжүүлэх, ажил үйлчилгээ, төсөл арга хэмжээний үнэлгээний хороонд ажиллах иргэдийн нэрсийг батлав. Уг асуудлыг хэлэлцэх үеэр өнгөрсөн онд үнэлгээний хороонд орж ажилласан иргэдийн 50 хувь нь үнэлгээний хорооны ажилд оролцоогүй гэдгийг онцолж байсан билээ. Иймд НИТХ-ын дарга Ж.Батбаясгалан нийслэлийн иргэдийг төрийн байгууллагын хэрэгжүүлж буй төсөл арга хэмжээнд хяналт тавих эрхээ эдлэн үнэлгээний хороонд орж идэвхтэй байхыг уриалсан юм. Мөн холбогдох албан тушаалтнуудад иргэдийн оролцоог хангах тал дээр анхаарч ажиллахыг даалгалаа.
Тэргүүлэгчдийн хуралдааны төгсгөлд НИТХ-ын ээлжит III хуралдааныг ирэх 7 хоногийн лхагва гарагт буюу энэ сарын 10-нд хуралдуулахаар товлолоо.
