Улаанбаатар
Буриадад дотоодын зорчих хөдөлгөөнийг хязгаарлажээ
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. ОХУ-ын Бүгд найрамдах Буриад улсад батлагдсан коронавируст халдварын тохиолдол өчигдрийн байдлаар 148 хүнээр нэмэгдэж, нийт батлагдсан тохиолдолд 27.403 болов.
Үүнээс нийслэл Улаан-Үд хотод 83 хүн халдварлаж нийт тохиолдлыг 14.726 болгожээ. Мөн өчигдөр 133 хүн эмнэлгээс гарч, эмчлэгдэн эдгэрсэн хүний нийт тоо 24.657 болов. Буриадад коронавирусний халдварын тархалт эхэлснээс хойш 620 хүн эндсэн байна. Өчигдөр 3 хүн нас баржээ.
Буриад улс нэгдүгээр сарын 20 хүртэл ОХУ-ын дотоодоос тус улс руу зорчих хөдөлгөөнийг хязгаарласан хэвээр байна.
Олон улсын болон дотоодын мэдээллийн сайтуудын мэдээлснээр ОХУ-д Англи улсаас үүдэлтэй "COVID-19"-ийн шинэ хувилбар бүртгэгдээд байна. Шинэ вирусний халдвар Их Британиас ОХУ руу буцаж ирсэн хүмүүст тандалтын журмаар хийсэн шинжилгээний үеэр илэрчээ.
ОХУ-д одоогоор "COVID-19"-оор 3.4 сая хүн халдвар авч, 61 мянга гаруй хүн нас бараад байна.
