Спорт авиралтын тэмцээнд нэг сумын 400 шахам тамирчин оролцож байна

МОНГОЛЫН МЭДЭЭ | СПОРТ
dusem11@yahoo.com
2020-10-13 15:27:39

Улаанбаатар /МОНЦАМЭ/. Спорт авиралтын олон улсын стандартын дагуу барьсан, Монгол Улсдаа анхдагч байгууламж Говь-Алтай аймгийн Тонхил суманд байдаг.


Тус сумын уугуул иргэн, уулын спортын ууган мастер Я.Жанцангийн нэрэмжит “Сутайн бор” клубийн захиалгаар уг авиралтын ханыг өнгөрсөн жил олон улсын стандартын дагуу барьж байгуулсан бөгөөд энд “Олимп” спорт авиралтын төвийн нэг жилийн ойд зориулсан Спорт авиралтын тэмцээн 5 дахь өдрөө үргэлжилж байгаа аж.



Улсдаа хамгийн олон уулын спортын тамирчинтай тус сумын ерөнхий боловсролын сургуулийн аварга шалгаруулах анхдугаар тэмцээн юм.


Тэмцээнд бага нас 2-5 дугаар анги, өсвөр нас 6-8 дугаар анги, залуучууд 9-12 дугаар анги гэсэн ангиллаар сурагчид спорт авиралтын хурд болон техникийн төрлүүдээр аваргуудаа шалгаруулах юм.


Бага насны хурдны төрөлд 126, өсвөр болон залуучуудын ангилалд 56, нийт 182 сурагч багачууд хурдны аваргуудаа өнгөрсөн өдрүүдэд тодруулжээ.



Ирэх өдрүүдэд залуучууд спорт авиралтын техникийн төрлөөр аваргуудаа шалгаруулна. Оролцогчдын тоо нэмэгдэх бөгөөд урьдчилсан байдлаар 200-г давахаар байгаа аж. Тус тэмцээн “COVID-19” халдварын өндөржүүлсэн бэлэн байдлын үед, хөдөө орон нутагт анх удаа зохион байгуулж байгаагаараа онцлогтой юм.

 

”Олимп” Спорт авиралтын төв нь олон улсын стандартад нийцсэн манай улс дахь одоогоор цор ганц байгууламж бөгөөд Монголын үндэсний олимпын хорооны тэргүүн дээд шагнал “Бөртэ чоно-2019” шагналыг шилдэг бүтээн байгуулалтын төрөлд хүртсэн юм.



Спорт авиралт нь ирэх онд болох “Токио-2020 олимпын наадмаас эхлэн олимпын албан ёсны төрөлд багтжээ.





Холбоотой мэдээ