Нийслэлийн дүүргүүд “Төгсөгчдийн төгөл”-тэй болно

Монголын мэдээ | Байгаль орчин
ulzii@montsame.mn
2020-05-09 18:37:42

Улаанбаатар /МОНЦАМЭ/. Нийслэлийн есөн дүүрэгт Их, дээд сургууль, ерөнхий боловсролын сургуулийн төгсөгчдөд зориулан “Төгсөгчдийн төгөл” байгуулах санаачлагыг өнөөдөр /2020.05.09/ эхлүүллээ.


Монгол Улсын Ерөнхийлөгчийн 2010 оны 63 дугаар зарлигийн дагуу бүх нийтээр “Мод тарих үндэсний өдөр” 2020 оны тавдугаар сарын 9, 10-нд тохиож байна. Хоёр өдөр үргэлжлэх энэ ажлын хүрээнд нийслэлийн Агаар орчны бохирдол хариуцсан орлогч Д.Мөнхжаргалын санаачилгаар байгуулагдсан мод, модлог ургамлын үрсэлгээны сургалт, судалгааны төв нээлтээ хийж, дүүрэг бүрт төгөл байгуулах газрын гэрчилгээг гардуулав.


-+2-------------+21+6

Улаанбаатар хотын ногоон бүсийн ой бүхий талбайг нэмэгдүүлж, цөлжилтөөс хамгаалах, агаар, орчны бохирдлыг бууруулах, ногоон төгөл байгуулах зорилгоор “Төгсөгчдийн төгөл” байгуулж, дүүрэг бүрийн Боловсролын хэлтэст төгсөгчдийн нэрэмжит ойн төгөл байгуулах  3 га газрыг олгож, газрын гэрчилгээг гардуулах ёслол өнөөдөр нийслэлийн Баянзүрх дүүрэг дэх Минж нутагшуулах төвд болов. Тус ёслолд Агаар, орчны бохирдлын асуудал хариуцсан орлогч Д.Мөнхжаргал, Хүний хөгжил, нийгмийн бодлогын асуудал хариуцсан орлогч Ш.Анхмаа, нийслэлийн Байгаль орчны газрын дарга Э.Баттулга, нийслэлийн Боловсролын газрын дарга Ж.Гантулга болон есөн дүүргийн Боловсролын хэлтсийн дарга нар оролцлоо.


“Минж нутагшуулах төв”-ийг түшиглэн агаар, орчны бохирдлыг хамгийн сайн шингээгч мод, модлог ургамлын үрсэлгээ хийх сургалт, судалгааны төвийг байгуулж, нээлтийг хийлээ. Энэхүү төвд хүүхэд залуучууд модны суулгац, модлог ургамлын үрсэлгээг хийх сургалт, дадлага сургуулалтыг хийж, ургуулсан суулгацаараа “Төгсөгчдийн төгөл байгуулах"  хотын ногоон байгууламж, ногоон бүсийн ойжуулалтыг хийх бөгөөд ойн аж ахуй эрхлэх, хашаа, эзэмшил газартаа мод тарих хүсэлтэй иргэдэд зориулсан үнэ төлбөргүй сургалтууд тогтмол явагдах юм.



Энэ үеэр Д.Мөнхжаргал “Өнгөрсөн жил НЗДТГ, НБОГ хамтран Гачуурт дахь нийслэлчүүдийн ундны усны хангамжийн эх үүсвэрийн хамгаалалтын бүсийн 100 га талбайд навчит болон шилмүүст мод тарьж, усны ундрагыг нэмэгдүүлэх, экологийн тэнцвэрийг хангаж, хөрсний доройтлоос сэргийлэх ажил хийсэн. Мөн Сонгинохайрхан дүүргийн 2 хорооны Жаргалантын аманд Хогийн цэг байсан талбайд “Мөрөөдлийн ой” төслийг эхлүүлэн Улаанбаатар хотын хоёр дахь томоохон цэцэрлэгт хүрээлэн буюу 100 га талбайг 2018-2027 оны хооронд жил бүр 10 га талбайг ойжуулах ажлыг Улаанбаатар хот, БНСУ-ын Инчеон хотын хамтын ажиллагааны хүрээнд буцалтгүй тусламжаар хэрэгжүүлж байна. Энэ жилийн хувьд хүүхэд залуучуудад зориулсан мод үрсэлгээний Ботаникийн цэцэрлэг байгуулж, 2020 оны Газар зохион байгуулалтын төлөвлөгөөнд 9 дүүргийн Боловсролын хэлтэст зориулан “Төгсөгчдийн төгөл” байгуулах газар олгож, ажлыг эхлүүлж байгаа гэдгээрээ онцлог юм” гэлээ.


Нийслэлийн орлогч дарга Ш.Анхмаа “Хүүхэд залуучуудад экологийн боловсрол олгоно гэдэг хамгийн чухал боловсрол. Цаашид байгаль дэлхийтэйгээ хэрхэн зөв харьцах талаар болон ногоон хөгжлийг Монгол Улсдаа хөгжүүлэх суурийг сурагч байхад нь олгох ёстой. Хүүхэд, залуучууд маань энэ газарт ирж танхимийн сургалтуудад хамрагдаж, байгаль хамгаалах экологийн боловсролыг олж аваасай гэж хүсч байна” гэв.


Түүнчлэн өнөөдөр мод тарих үндэсний өдрийг тохиолдуулан биологийн олон янз байдлыг хамгаалах “Минж нутагшуулах төв”-д холбогдох албаны хүмүүс 200 гаруй улиас, шар хуайс суулгасан юм. Өндөржүүлсэн бэлэн байдлын зэрэгт шилжсэнтэй холбогдуулан олон нийтийг хамарсан байдлаар мод тарих арга хэмжээг зохион байгуулахгүй байгаа тул иргэд та бүхэн эрүүл мэндийн байгууллагаас өгч буй зөвлөмж, дэглэмийг чанд сахихыг энэ үеэр албаны хүмүүс онцолж байв.



Жил бүрийн 5, 10 дугаар сарын хоёр дахь долоо хоногийн “Бямба” гарагийг бүх нийтээр мод тарих үндэсний өдөр болгон зарласан бөгөөд энэ өдөр мод тарихад тохиромжтой байгалийн нөхцөл бүрдсэн байдаг учир  5 дугаар сард өрх бүр хашаандаа, амьдардаг орчиндоо мод, бут, сөөг, цэцэг тарьж, арчлан хамгаалах, түүнийгээ амьдралын хэв маяг болгон хэвшүүлэн орчны бохирдлыг бууруулахад гар бие оролцон ажиллахыг Монгол Улсын нийт ард иргэд, айл өрх, төрийн болон төрийн бус байгууллага, аж ахуйн нэгжид уриалж байна.


Нийслэлийн есөн дүүрэгт хортонд идэгдсэн, түймэрт өртсөн, мод тарих боломжтой газрын байршлыг урьдчилан төлөвлөж /1884 га/, өөрсдийн хөрөнгөөр дээрх газруудад мод тарих хүсэлтэй иргэн, аж ахуйн нэгж байгууллагуудтай гэрээ байгуулах замаар таримал ойг улсын санд хүлээн авах шинэ менежментийг нэвтрүүлсэн бөгөөд өөрийн хөрөнгөөр ойжуулалт хийх, хөв цөөрөм байгуулах, орон нутгийн хамгаалалттай газар байгаль хамгааллын ажил хэрэгжүүлэх сонирхолтой байгууллагууд нийслэлийн Байгаль орчны газрын Ойн хэлтэст хандах боломжтой” хэмээн Нийслэлийн ЗДТГ-ын Хэвлэл мэдээлэлтэй харилцах хэлтсээс мэдээлэв.

Холбоотой мэдээ